सोलापूर – मध्य रेल्वेचे महाव्यवस्थापक राजीव श्रीवास्तव यांनी २३ आणि २४ जून २०२६ रोजी सोलापूर विभागाची दोन दिवसीय सखोल पाहणी केली. लातूर रोड-कुर्डुवाडी-मिरज या सुमारे ३८५ मार्ग-किलोमीटर लांबीच्या पट्ट्यात केलेल्या या पाहणीदरम्यान, महाव्यवस्थापकांनी अनेक चालू आणि प्रस्तावित पायाभूत सुविधांच्या प्रकल्पांचा आढावा घेतला. कार्यान्वित सुविधांची पाहणी केली. रेल्वे अधिकारी, कर्मचारी आणि नागरिकांशी संवाद साधला, तसेच विशेषतः आगामी ‘आषाढी वारी’च्या पार्श्वभूमीवर प्रवासी सेवांच्या तयारीचा आढावा घेतला.
लातूर येथे, क्रू लॉबी, इलेक्ट्रॉनिक इंटरलॉकिंग इमारत, वॉशिंग-कम-पिट लाइन आणि स्टेबलिंग लाइनचे सुरू असलेले बांधकाम, मराठवाडा रेल कोच फॅक्टरी आणि ‘अमृत भारत स्टेशन योजने’अंतर्गत सुरू असलेल्या कामांची पाहणी केली. घर्णी येथे नवीन रेल्वे स्थानक उभारण्याच्या प्रस्तावाचाही सविस्तर आढावा घेण्यात आला.
मांजरा पूल, सीना पूल, भीमा पूल, बोगदा क्रमांक २, लेव्हल क्रॉसिंग गेट्स, ३३ केव्ही वीज वाहिनी क्रॉसिंग्ज, ब्रिज मास्ट व्यवस्था आणि विभागातील सुरक्षा व क्षमता वाढीची विविध कामे यांसारख्या महत्त्वाच्या अभियांत्रिकी मालमत्तेचीही पाहणी केली.
येडशी स्थानकाच्या पाहणीदरम्यान, स्वच्छता, हाऊसकीपिंग, प्रवासी सुविधा आणि स्थानक परिसराच्या देखभालीबाबत समाधान व्यक्त केले; तसेच सुरक्षित, स्वच्छ आणि प्रवाशांसाठी अनुकूल वातावरण राखण्यासाठी विविध विभागांनी केलेल्या समन्वित प्रयत्नांची त्यांनी दखल घेतली.
कुर्डुवाडी येथे त्यांनी रेल्वे वर्कशॉप, रनिंग रूम, अल्ट्रासोनिक फ्लॉ डिटेक्शन कार्यालय, ‘कवच’ यंत्रणा कक्ष आणि गँग हट यांची पाहणी केली; तसेच आघाडीवरील कर्मचाऱ्यांशी संवाद साधला आणि विभागात राबविल्या जाणाऱ्या आधुनिक सुरक्षा तंत्रज्ञानाचा आढावा घेतला.
पंढरपूर येथील आषाढी वारी २०२६ च्या तयारीचा आढावा घेतला. या वार्षिक वारीदरम्यान येणाऱ्या भाविकांच्या मोठ्या संख्येचा विचार करता, प्रवाशांसाठी उत्तम सुविधा, पुरेसा पाणीपुरवठा, प्रभावी गर्दी नियंत्रण आणि कामकाजाची सज्जता सुनिश्चित करण्यावर त्यांनी विशेष भर दिला. आषाढी वारीदरम्यान भाविकांकडून रेल्वे रुळावरून केल्या जाणाऱ्या पारंपरिक मार्गक्रमणाची पाहणी करताना, त्यांनी स्थानिक ग्रामस्थांशी संवाद साधला आणि त्यांच्या सूचनांची नोंद घेतली. तसेच, कुर्डुवाडी आणि पंढरपूर येथे लोकप्रतिनिधी व प्रवाशांकडून स्थानक विकास आणि गाड्यांच्या थांब्यांबाबतची निवेदने स्वीकारली आणि या स्थानकांशी संबंधित प्रवासी समस्यांवर चर्चा केली.
या पाहणी दौऱ्यात मध्य रेल्वेच्या महाव्यवस्थापकांसोबत सोलापूर विभागाचे विभागीय रेल्वे व्यवस्थापक, अतिरिक्त विभागीय रेल्वे व्यवस्थापक, तसेच विविध विभागांचे अधिकारी आणि कर्मचारी उपस्थित होते.
