सोलापूर – महाराष्ट्र लोकसेवा आयोगाच्या ‘महाराष्ट्र गट-क सेवा संयुक्त पूर्व परीक्षा २०२६’मध्ये यंदा अर्जांची संख्या विक्रमी पातळीवर पोहोचली आहे. तब्बल १२ लाख ६३ हजार उमेदवारांनी अर्ज दाखल केले असून, ५,७०७ पदांसाठी मोठी स्पर्धा निर्माण झाली आहे. विशेष म्हणजे सोलापूर जिल्ह्यातून सुमारे ४१ हजार उमेदवारांनी अर्ज भरल्याची माहिती आहे.
आयोगाने २५ जून २०२६ रोजी प्रसिद्ध केलेल्या जाहिरातीत सुरुवातीला २,६१९ पदांची भरती जाहीर केली होती. त्यानंतर विविध विभागांकडून प्राप्त झालेल्या मागणीपत्रांचा विचार करून आयोगाने आणखी ३,०८८ पदांची भर घातली. त्यामुळे पदांची एकूण संख्या ५,७०७ झाली आहे. पदसंख्येत झालेली ही मोठी वाढ उमेदवारांसाठी दिलासादायक असली, तरी अर्जदारांची संख्या पाहता प्रत्येक जागेसाठी मोठी चुरस राहणार आहे.
या भरतीतील सर्वाधिक चर्चेचे पद असलेल्या ग्राम महसूल अधिकारी (तलाठी) गट-क संवर्गात १,५३९ जागा आहेत. याशिवाय महसूल व वन विभागातील लिपिक-टंकलेखक ४८०, नोंदणी व मुद्रांक विभागातील लिपिक-टंकलेखक ३३९, सहाय्यक मत्स्यव्यवसाय विकास अधिकारी २५४, नियंत्रक शिधावाटप व संचालक नागरी पुरवठा कार्यालयातील २३० पदांसह विविध संवर्गातील पदांचा समावेश आहे.अन्न, नागरी पुरवठा व ग्राहक संरक्षण विभागात १५५, आदिवासी विकास विभागात ६९, तर सहाय्यक अधीक्षक तसेच वरिष्ठ अभिलेखापाल, वरिष्ठ लिपिक व अभिलेखापाल या पदांचाही भरतीमध्ये समावेश करण्यात आला आहे.
दरम्यान, पूर्व परीक्षेच्या निकालापूर्वी विविध विभागांचे आरक्षणनिहाय अतिरिक्त तक्ते प्रसिद्ध केले जाणार असल्याचे आयोगाने स्पष्ट केले आहे. त्यामुळे पदसंख्या कमी आहे किंवा एखाद्या संवर्गाचा समावेश झालेला नाही, असे समजून उमेदवारांनी अर्ज करण्याचे टाळू नये, असे आवाहन आयोगाने केले आहे.
कोट
‘अर्जदार वाढत आहेत, परीक्षा वेळेत घ्या’
जाहिरात प्रसिद्ध झाल्यापासून लाखो विद्यार्थ्यांनी अर्ज केले आहेत. परीक्षांच्या कालावधीत वाढ होत असल्याने बेरोजगार उमेदवारांची संख्या दिवसेंदिवस वाढत आहे. पाच लाखांपेक्षा अधिक उमेदवारांनी अर्ज केल्यास सर्वांसाठी सरसकट ५०० रुपये परीक्षा शुल्क आकारण्याचा विचार शासनाने करावा. परीक्षा प्रक्रिया लवकर पूर्ण झाल्यास उमेदवारांना रोजगाराची संधी मिळेल आणि पुढील भरतीमध्ये अर्जदारांची संख्या कमी होण्यास मदत होईल. भरती प्रक्रिया पारदर्शक आणि गतिमान पद्धतीने राबवून वेळेत परीक्षा, निकाल, निवड आणि नियुक्तीचे आदेश देणे गरजेचे असल्याचे स्पर्धा परीक्षा विद्यार्थी असोशिएशनचे राज्य उपाध्यक्ष प्रशांत शिरगुर यांनी सांगितले.
चौकट
आकडेच सांगतात स्पर्धेची तीव्रता
१२.६३ लाख अर्ज : ५,७०७ पदे
सोलापूर : सुमारे ४१ हजार अर्जदार
नव्याने वाढलेली पदे : ३,०८८
सुरुवातीची पदसंख्या : २,६१९
अंतिम पदसंख्या : ५,७०७
