अक्कलकोट – ग्रामीण भागातील विद्यार्थ्यांच्या कल्पकतेला, जिद्दीला आणि वैज्ञानिक प्रतिभेला राष्ट्रीय स्तरावर मानाची पावती मिळाली आहे. नागनळळी येथील के. एस. एम. कनिष्ठ महाविद्यालयाच्या विद्यार्थ्यांनी विकसित केलेल्या ‘स्मार्ट अॅग्रिकल्चरल इक्विपमेंट’ या नाविन्यपूर्ण विज्ञान प्रकल्पाची ५३व्या राष्ट्रीय बाल वैज्ञानिक प्रदर्शनासाठी (RBVP–2026) निवड झाली आहे. राष्ट्रीय शैक्षणिक संशोधन आणि प्रशिक्षण परिषद (NCERT), नवी दिल्ली यांच्या दिनांक ६ नोव्हेंबर २०२६ रोजीच्या अधिकृत पत्राद्वारे ही निवड जाहीर करण्यात आली.
महाराष्ट्र राज्यात इतर मागास बहुजन कल्याण विभागांतर्गत ९७७ आश्रमशाळा कार्यरत आहेत. या विस्तृत शैक्षणिक व्यवस्थेतील नागनळळी आश्रमशाळेच्या विद्यार्थ्यांनी राष्ट्रीय विज्ञान प्रदर्शनापर्यंत मजल मारली आहे. या विभागाच्या आश्रमशाळेतील विद्यार्थ्यांना राष्ट्रीय स्तरावरील विज्ञान प्रदर्शनात सहभागी होण्याची मिळालेली ही पहिलीच संधी असल्याचे विशेषत्वाने नमूद केले जात आहे. त्यामुळे ही उपलब्धी केवळ नागनळळी आश्रमशाळेपुरती मर्यादित नसून संपूर्ण विभागासाठी गौरवास्पद आणि ऐतिहासिक ठरणारी आहे.
शैक्षणिक वर्ष २०२५-२६ मध्ये या प्रकल्पाने तालुका, जिल्हा आणि राज्यस्तरीय निवड प्रक्रियेत यशस्वी कामगिरी करत राष्ट्रीय स्तरावर आपले स्थान निश्चित केले आहे. देशातील प्रतिष्ठेचे हे विज्ञान प्रदर्शन पुदुच्चेरी येथे दिनांक १४ ते १९ डिसेंबर २०२६ या कालावधीत आयोजित करण्यात आले आहे. देशभरातील विद्यार्थी या प्रदर्शनात आपल्या नाविन्यपूर्ण वैज्ञानिक संकल्पना, संशोधनात्मक प्रयोग आणि तंत्रज्ञानाधारित प्रकल्प सादर करणार आहेत.
या उल्लेखनीय विज्ञान प्रकल्पाची निर्मिती इयत्ता बारावी विज्ञान शाखेतील विद्यार्थी ओंकार सुरेश फडतरे आणि महेश श्रीमंत टेंगळे यांनी केली आहे. या विद्यार्थ्यांना के. एस. एम. कनिष्ठ महाविद्यालयाचे प्रा. रविंद्र नवले यांचे मोलाचे मार्गदर्शन लाभले. तसेच प्रयोगशाळा सहाय्यक श्री. नुरुद्दीन रशीद शेख यांनी प्रकल्पाच्या निर्मितीसाठी आवश्यक तांत्रिक व प्रायोगिक सहकार्य केले.
विशेष म्हणजे, अक्कलकोट तालुक्याला नागनळळी आश्रमशाळेच्या माध्यमातून राष्ट्रीय स्तरावरील बाल वैज्ञानिक प्रदर्शनात सहभागी होण्याची ही पहिलीच संधी मिळाली आहे. ग्रामीण भागातील तसेच विमुक्त जाती व भटक्या जमातीतील विद्यार्थ्यांमध्येही प्रचंड गुणवत्ता, संशोधनवृत्ती आणि वैज्ञानिक दृष्टिकोन दडलेला असतो. योग्य शैक्षणिक वातावरण, तज्ज्ञांचे मार्गदर्शन आणि प्रोत्साहन मिळाल्यास हे विद्यार्थीही राष्ट्रीय स्तरावर आपले कर्तृत्व सिद्ध करू शकतात, याचा प्रत्यय नागनळळीच्या विद्यार्थ्यांनी आपल्या यशातून दिला आहे.
या यशामुळे नागनळळीच्या शैक्षणिक क्षेत्राच्या शिरपेचात मानाचा तुरा रोवला गेला असून, आश्रमशाळेच्या शैक्षणिक गुणवत्तेची आणि विद्यार्थ्यांच्या सुप्त गुणांना वाव देणाऱ्या उपक्रमशील शैक्षणिक वातावरणाची राष्ट्रीय स्तरावर दखल घेतली गेली आहे. या निवडीमुळे अक्कलकोट तालुक्यासह महाराष्ट्राच्या शैक्षणिक क्षेत्राच्या लौकिकात निश्चितच भर पडणार आहे.
विद्यार्थ्यांनी संपादन केलेल्या या अभूतपूर्व यशाबद्दल महाविद्यालयाचे प्राचार्य श्री. मुजावर आय. एम. आणि संस्थेचे सचिव श्री. जावेद पटेल यांनी विद्यार्थी, मार्गदर्शक प्राध्यापक आणि सहकार्य करणाऱ्या कर्मचाऱ्यांचे विशेष अभिनंदन केले. तसेच राष्ट्रीय स्तरावरील प्रदर्शनातही विद्यार्थी आपल्या प्रकल्पाची प्रभावी मांडणी करून यशाची नवी उंची गाठतील, असा विश्वास व्यक्त करत त्यांना पुढील वाटचालीसाठी शुभेच्छा दिल्या.
ग्रामीण मातीतील बुद्धिमत्तेला राष्ट्रीय व्यासपीठ मिळाले, तर ती देशाच्या वैज्ञानिक प्रगतीतही मोलाचे योगदान देऊ शकते, हा प्रेरणादायी संदेश नागनळळीच्या विद्यार्थ्यांनी आपल्या कर्तृत्वातून दिला आहे. त्यांची ही यशोगाथा निश्चितच राज्यातील आश्रमशाळांमधील विद्यार्थी, शिक्षक आणि शैक्षणिक संस्थांसाठी प्रेरणादायी ठरणार आहे.
Views: 31