जालना : शहरातील विविध नागरी समस्यांबाबत भाजप जालना महानगर जिल्हाध्यक्ष तथा नगरसेवक भास्कर आबा दानवे यांनी आज दिनांक ७ एप्रिल रोजी महानगरपालिका आयुक्तांची भेट घेऊन सविस्तर चर्चा केली. यावेळी शहर विकास आराखडा, संत रोहिदास महाराज स्मारकासाठी जागा उपलब्ध करून देणे,शहरातील मोकाट जनावरे, मोकाट कुत्र्यांचा वाढता त्रास, तसेच मनपा नियमावलीच्या प्रभावी अंमलबजावणीसंदर्भात विविध मुद्द्यांवर चर्चा करण्यात आली.
यावेळी चर्चा करताना जालना शहराच्या डीपी प्लॅन (Development Plan) संदर्भातही सविस्तर चर्चा करण्यात आली. शहराचा नियोजित व सर्वांगीण विकास होण्यासाठी रस्ते, पाणीपुरवठा, उद्याने, सार्वजनिक सुविधा तसेच भविष्यातील वाढती लोकसंख्या लक्षात घेऊन विकास आराखडा प्रभावीपणे राबवावा याचबरोबर जालना शहरात संत शिरोमणी रोहिदास महाराज यांच्या स्मारकासाठी महानगरपालिका हद्दीतील जागा उपलब्ध करून व सुशोभीकरणासाठी निधी निधीची तरतूद करण्यात यावी.
शहरातील अनेक भागांमध्ये मोकाट कुत्र्यांमुळे वाहतुकीस अडथळा निर्माण होत असून नागरिकांच्या सुरक्षिततेचाही प्रश्न निर्माण झाला आहे. तसेच मोकाट कुत्र्यांच्या वाढत्या संख्येमुळे नागरिकांमध्ये भीतीचे वातावरण निर्माण झाले असून लहान मुले, ज्येष्ठ नागरिक व महिला यांना मोठा त्रास सहन करावा लागत असल्याचे यावेळी निदर्शनास आणून देण्यात आले. या समस्यांवर तातडीने उपाययोजना करून विशेष मोहीम राबविण्याची मागणी करण्यात आली. शहरातील स्वच्छता, वाहतूक व्यवस्था अतिक्रमण, अनियमित कामांवर प्रशासनाने विशेष लक्ष द्यावे व नागरिकांच्या तक्रारींना तत्काळ प्रतिसाद द्यावा अशी मागणी भास्कर आबा दानवे यांनी केली.
यावेळी उपमहापौर राजेश राऊत,स्थायी समिती सभापती अशोक अण्णा पांगारकर,गटनेता महेश निकम, नगरसेवक अर्जुन गेही, अक्षय गोरंठ्याल,शशिकांत घुगे, अशोक पवार, आनंद झारखंडे, विष्णू डोंगरे, देविदास देशमुख, राजेश जोशी, सुनिल पवार, सुहास मुंडे, प्रा.सुजित जोगस, अमोल धानुरे, आकाश देशमाने, रोहित खोडवे, शिवराज नारियलवाले यांची उपस्थिती होती.
