लोकसभा निवडणुकीनंतर आता देशातील 7 राज्यांमधील 13 विधानसभा मतदारसंघात पोटनिवडणूक होणार आहे. केंद्रीय निवडणूक आयोगाने आज, सोमवारी या पोटनिवडणुकीची घोषणा केली. देशातील बिहार, पश्चिम बंगाल, तामिळनाडू, मध्य प्रदेश, उत्तराखंड, पंजाब आणि हिमाचल प्रदेशात विधानसभेसाठी पोटनिवडणूक होणार आहे. ही पोटनिवडणूक पश्चिम बंगालच्या माणिकतला, राणाघाट दक्षिण, बागडा, रायगंज बिहारच्या रुपौली, तामिळनाडूच्या विक्रावंदी, हिमाचलमधील देहरा, हमीरपूर, नालागड, उत्तराखंडच्या बद्रीनाथ, मंगलोर, पंजाबमधील जालंधर (पश्चिम) आमि मध्यप्रदेशच्या अरवाडा येथे होणार आहे.
या पोटनिवडणुकसाठी 10 जुलै रोजी मतदान होणार असून 13 जुलै रोजी मतमोजणी होणार आहे. निवडणूक आयोगानुसार, ज्या जागांसाठी निवडणुका होणार आहेत, त्या जागांसाठी अधिसूचना 14 जून रोजी प्रसिद्ध केली जाईल. तसेच, उमेदवारी अर्ज भरण्याची शेवटची तारीख 21 जून असणार आहे. तर 24 जून रोजी उमेदवारी अर्जांची छाननी होणार आहे. उमेदवारी अर्ज मागे घेण्याची अंतिम तारीख 26 जून असणार आहे. दरम्यान 10 जुलै रोजी होणाऱ्या निवडणुकीत बिहारमधील एका विधानसभेच्या जागेवर, पश्चिम बंगालमधील 4 जागांसाठी, तामिळनाडूतील 1, मध्य प्रदेशातील 1, उत्तराखंडमधील 2, पंजाबमधील 1 आणि हिमाचलमधील 3 जागांसाठी मतदान होणार आहे.
