सोलापूर : शहर गुन्हे शाखेच्या पोलीस पथकाने ४ सराईत आंतरजिल्हा चोरट्यांना अटक करून सोलापूर शहरातील दोन घरफोडीचे गुन्हे व खडकीस आणले आहेत .या चोरट्यांकडून सोन्याचे दागिने, रोख रक्कम
आणि गुन्ह्यात वापरलेली कार असा एकूण ५ लाख रुपये किमतीचा मुद्देमाल हस्तगत केला आहे . घरफोडीचे दोन गुन्हे उघडकीस आणले आहेत.
दीपक बाळू ढेरंगे (वय ३४, रा. कोरेगाव भिमा, जि. पुणे), दत्ता अरुण कदम (वय ३८, रा. नऱ्हे, ता. हवेली, जि. पुणे), आकाश सूर्यकांत आंग्रे (वय २९, रा. बिबवेवाडी, पुणे), साहेबराव लक्ष्मण बेंडूरे (वय ५३, रा. दहिसर वेस्ट, मुंबई) असे अटक केलेल्या आरोपींची नावे आहेत.
या अटक करण्यात आलेल्या आरोपींपैकी दीपक ढेरंगे याच्यावर मारामारी, खुनाचा प्रयत्न, दरोडा, आणि बेकायदेशीर शस्त्र बाळगल्या प्रकारचे अनेक गंभीर गुन्हे दाखल आहेत. तर दत्ता कदम याच्यावर फसवणूक, खंडणीसारखे गुन्हे दाखल आहेत. या दोघांवर यापूर्वी अहिल्यानगर आणि पुणे शहर पोलिसांनी ‘मकोका’ अंतर्गत कारवाई देखील केलेली आहे.
सोलापूर शहरातील न्यू बुधवार पेठ भागात दि. ४ मे रात्री ते ५ मे च्या दरम्यान एकाच रात्री फकीरा चौक येथील दोन बंद घरांचे कडी-कोयंडा उचकटून आणि कुलूप तोडून चोरी झाल्याचा गुन्हा दाखल झाला होता. या दोन्ही घटनांचे गांभीर्य ओळखून गुन्हे शाखेचे शहर गुन्हे शाखेचे वरिष्ठ पोलीस निरीक्षक अरविंद माने, सपोनि शैलेश खेडकर, सपोनि जे. व्ही. गळवे व त्यांच्या पथकाने घटनास्थळाला भेट देऊन सी.सी.टी.व्ही फुटेज आणि मिळालेल्या तांत्रिक माहितीच्या आधारे आरोपींची माहिती काढली. या माहितीच्या आधारे सपोनि शैलेश खेडकर व पथकाने थेट पुणे शहरात जाऊन सापळा रचला आणि ४ सराईत आरोपींना ताब्यात घेतले. यात दीपक ढेरंगे, दत्ता कदम, आकाश आंग्रे, साहेबराव बेंडूरे यांना अटक केली. त्यांना पोलिसी खाक्या दाखवताच आरोपींनी गुन्ह्याची कबुली दिली. पोलिसांनी आरोपींकडून १५ हजार रोख, ३० हजारांचे सोन्याचे दागिने आणि गुन्ह्यात वापरलेली कार असा एकूण ४ लाख ९५ हजारांचा मुद्देमाल जप्त केला आहे.
सदरची कामगिरी शहर गुन्हे शाखेचे वरिष्ठ पोलीस निरीक्षक अरविंद माने, सपोनि शैलेश खेडकर, सपोनि जे. व्ही. गळवे तसेच पोलीस अंमलदार संदीप जावळे, विनोद राजपूत, इम्रान जमादार, उमेश पवार, दीपक जाधव, मंजुनाथ मुत्तनवार, राजेश मोरे, अजय गुंड, बाळासाहेब काळे, सतीश काटे, प्रकाश गायकवाड, मच्छिंद्र राठोड व रतिकांत राजमाने यांनी पार पाडली .
