सोलापूर – राज्यातील पवित्र पोर्टलद्वारे होणाऱ्या शिक्षक भरती प्रक्रियेत इंग्रजी माध्यमातील शिक्षकांच्या पात्रतेबाबत निर्माण झालेला संभ्रम दूर करण्यासाठी शालेय शिक्षण विभागाने महत्त्वाचे शुद्धीपत्रक जारी केले आहे. सुधारित निकषांमुळे पात्र उमेदवारांना संधी मिळणार असून, रिक्त शिक्षक पदे भरण्याच्या प्रक्रियेलाही गती मिळण्याची अपेक्षा व्यक्त होत आहे.
दरम्यान, २४ जुलै रोजी जारी करण्यात आलेल्या शुद्धीपत्रकानुसार, इयत्ता पहिली ते पाचवीच्या सेमी इंग्रजी वर्गांसाठी शिक्षकांची व्यावसायिक शैक्षणिक अर्हता इंग्रजी माध्यमातून पूर्ण केलेली असणे आवश्यक राहील. तसेच उमेदवाराने ज्या माध्यमातून शालेय परीक्षा उत्तीर्ण केली आहे किंवा ज्या विषयात पदवी संपादन केली आहे, त्या माध्यमातील शाळांसाठी त्याचा विचार करण्यात येणार आहे.
याशिवाय संबंधित प्रवर्गातील इंग्रजी माध्यमाची व्यावसायिक पात्रता असलेल्या उमेदवारांना देखील भरती प्रक्रियेत पात्र मानण्यात येणार आहे. अशा उमेदवारांची उपलब्धता नसल्यास संबंधित पदे रिक्त ठेवली जाणार नाहीत. त्यासाठी शासनाने पर्यायी शैक्षणिक पात्रतेलाही मान्यता दिली आहे.
बारावी विज्ञान (इंग्रजी), बी.ए. (इंग्रजी), एम.ए. (इंग्रजी) किंवा बी.ए.-एम.ए. (इंग्रजी साहित्य) अशा शैक्षणिक पात्रता असलेल्या उमेदवारांनाही पात्रतेच्या कक्षेत समाविष्ट करण्यात आले आहे. त्यामुळे इंग्रजी विषयाचे शिक्षण घेतलेल्या अनेक उमेदवारांना शिक्षक भरतीमध्ये संधी उपलब्ध होणार आहे.
या सुधारित निर्णयामुळे पात्रतेसंदर्भातील अनेक शंका दूर झाल्या असून, शिक्षक भरती प्रक्रिया अधिक पारदर्शक, सुस्पष्ट आणि परिणामकारक होईल, असा विश्वास शिक्षण क्षेत्रातून व्यक्त केला जात आहे. तसेच इंग्रजी माध्यमातील शिक्षकांची कमतरता भरून काढण्यासाठी शासनाच्या या निर्णयाचा सकारात्मक परिणाम होण्याची शक्यता आहे.
