बार्शी – वैशाख कृष्ण द्वादशीनिमित्त गुरुवार दि. १४ मे रोजी बार्शी येथील श्री भगवंत मंदिरात आमदार दिलीप सोपल गटाच्या वतीने भक्तिमय वातावरणात महापूजेचे आयोजन करण्यात आले. विश्वास बारबोले दांपत्य, योगेश सोपल दांपत्य, युवराज काटे दांपत्य, गणेश जाधव दांपत्य तसेच शिंदे दांपत्य यांच्या हस्ते विधीवत महापूजा संपन्न झाली. यावेळी आमदार दिलीप सोपल, आजी-माजी नगरसेवक, पदाधिकारी उपस्थित होते.
बार्शीचे ग्रामदैवत असलेल्या श्री भगवंताचे महात्म्य विशद करताना आमदार दिलीप सोपल म्हणाले की, भक्त राजा अंबरीष यांच्यावर आलेले संकट दूर करण्यासाठी आणि दुर्वास ऋषींच्या शापातून त्यांची मुक्तता करण्यासाठी श्री भगवंत द्वादशीच्या दिवशी बार्शीत प्रकट झाले. त्यामुळे प्रत्येक द्वादशी ही श्री भगवंत प्रकट दिनाइतकीच महत्त्वपूर्ण आहे. या धार्मिक परंपरेचे जतन व्हावे आणि द्वादशीचे महत्त्व समाजापर्यंत पोहचावे यासाठी द्वादशी महापूजेचा नवा उपक्रम सुरु करण्यात आल्याचे त्यांनी सांगितले.
ते पुढे म्हणाले की, वारकरी संप्रदायात पंढरपूरच्या विठ्ठलासाठी एकादशीचे व्रत केले जाते आणि द्वादशीला श्री भगवंताचे दर्शन घेऊन उपवास सोडण्याची वारकरी परंपरा आहे. संत परंपरेतील ही श्रद्धा आणि अध्यात्मिक वारसा पुढील पिढ्यांपर्यंत पोहोचावा, या उद्देशाने द्वादशी महापूजेची सुरुवात करण्यात येत आहे.
देशासमोरील सध्याच्या परिस्थितीचा उल्लेख करताना आमदार सोपल यांनी सांगितले की, पंतप्रधान नरेंद्र मोदी यांनी पेट्रोल-डिझेल बचत, खाद्यतेलाचा संयमी वापर आणि अनावश्यक सोने खरेदी टाळण्याचे केलेले आवाहन लक्षात घेऊन सर्वांनी देशहितासाठी सहकार्य करणे आवश्यक आहे. देशावरील संकट लवकर दूर होऊन नागरिकांच्या जीवनात सुख, समृद्धी आणि आनंद नांदो, अशी प्रार्थना श्री भगवंत चरणी करण्यात आल्याचे त्यांनी सांगितले.
भविष्यात पेट्रोल-डिझेल, गॅस आदींच्या संभाव्य तुटवड्याचा फटका बार्शीकरांना बसू नये, यासाठी तहसीलदार एफ. आर. शेख यांच्याशी चर्चा करुन शहर व तालुक्यातील इंधन आणि गॅस पुरवठ्याचा आढावा घेतल्याचेही त्यांनी सांगितले. नागरिकांना कमीत कमी अडचणींचा सामना करावा लागावा, यासाठी महसूल विभाग आणि वितरण प्रणालीला योग्य नियोजनाच्या सूचना देण्यात आल्याचे त्यांनी स्पष्ट केले.
महापूजेनंतर श्री भगवान देवस्थानच्यावतीने आमदार दिलीप सोपल तसेच महापूजेस उपस्थित सर्व दांपत्यांचा सत्कार करण्यात आला. यावेळी देवस्थान समितीचे सरपंच दादासाहेब बुडूख, मुकुंदशेठ कुलकर्णी, सोमाणी भाऊ, नाना सुरवसे, माजी उपनगराध्यक्ष आबाजी पवार, कृष्णराज बारबोले, प्रा.किरण देशमुख, अंबादास शिंदे, नंदकुमार काशीद, मनिष चौहान, शंकर देवकर तसेच सोपल गटाचे आजी-माजी नगरसेवक व पदाधिकारी उपस्थित होते.
