पंढरपूर – ‘गणपती बाप्पा मोरया… पुढच्या वर्षी लवकर या’च्या जयघोषात आणि पारंपरिक ढोल-ताशा, लेझीमच्या तालावर पंढरपूर शहरासह परिसरातील घरगुती व सार्वजनिक गणेश मंडळांनी लाडक्या गणरायाला भावपूर्ण निरोप दिला. यंदा गणेशोत्सवाचा कालावधी बारा दिवसांचा असल्याने गेल्या काही दिवसांपासून शहरात सुरू असलेल्या उत्साहाला अनंत चतुर्दशीच्या दिवशी भक्तिमय वातावरणात विराम मिळाला.
घरगुती गणेशमूर्तीं बरोबरच विविध सार्वजनिक गणेश मंडळांनी आकर्षक सजावट, पारंपरिक वाद्ये, ढोल-ताशा पथके आणि लेझीम पथकांसह विसर्जन मिरवणुका काढल्या. अनेक मंडळांच्या मिरवणुकांमध्ये तरुणांसह महिला वर्गानेही मोठ्या उत्साहाने सहभाग घेतला. विशेषतः महिलांच्या ढोल पथकांनी उपस्थितांचे लक्ष वेधून घेतले. ढोल-ताशांच्या गजरात आणि लेझीमच्या तालावर गणेशभक्तांनी जल्लोष करत गणरायाला निरोप दिला.
——————
चौकट : ( छत्रपती शिवाजी चौकात गणेश मंडळांचे स्वागत )
पंढरपूर शहरातील छत्रपती शिवाजी चौकात तीर्थक्षेत्र विकास आघाडीच्या वतीने तसेच विविध नेते व पदाधिकाऱ्यांच्या उपस्थितीत गणेश मंडळांचे स्वागत करण्यात आले. यावेळी नगराध्यक्षा डाँ.प्रणिता भालके, अनिल सावंत, दिलीप धोत्रे यांच्यासह नगरसेवक व विविध पदाधिकारी उपस्थित होते. आमदार समाधान आवताडे यांच्या वतीनेही गणेश मंडळे आणि गणेश भक्तांचे स्वागत करण्यात आले. चौफाळा परिसरात मध्यवर्ती गणेश मंडळाच्या वतीनेही गणेश मंडळांचे स्वागत करण्यात आले. माजी आमदार प्रशांत परिचारक यांच्या वतीने विविध गणेश मंडळांचे स्वागत करण्यात आले. त्यामुळे विसर्जन मिरवणुकी दरम्यान शहरातील प्रमुख चौकांमध्ये भक्तिमय आणि उत्साहपूर्ण वातावरण निर्माण झाले होते.
——————
चौकट : ( महिलांची ढोल पथक ठरली आकर्षण )
यंदाच्या विसर्जन मिरवणुकीत पारंपरिक लेझीम आणि ढोल-ताशा पथकांचा मोठ्या प्रमाणात सहभाग दिसून आला. विशेषतः महिला ढोल पथकांनी आपल्या सादरीकरणातून उपस्थितांचे लक्ष वेधून घेतले. अनेक मंडळांनी पारंपरिक वेशभूषेत लेझीम सादरीकरण केले. काही गणेश मंडळांनी सामाजिक संदेश देणारी पथनाट्येही सादर केली. अनेक मंडळांकडून विविध विषयांवर सजीव देखावे देखील सादर करण्यात आले. त्यामुळे केवळ मनोरंजन न करता सामाजिक प्रबोधनाचा संदेशही मिरवणुकांमधून देण्यात आला. शहरातील प्रमुख रस्त्यांवर गणेशभक्तांची मोठी गर्दी झाली होती.
——————
चौकट : ( पोलिसांचा चोख बंदोबस्त )
विसर्जन मिरवणुका शांततेत आणि सुरळीत पार पडाव्यात यासाठी पोलिस प्रशासनाच्या वतीने शहरातील प्रमुख चौक व संवेदनशील ठिकाणी चोख बंदोबस्त ठेवण्यात आला होता. मिरवणुकीदरम्यान वाहतुकीची कोंडी होऊ नये, तसेच गणेशभक्तांना कोणतीही अडचण निर्माण होऊ नये यासाठी पोलिसांकडून आवश्यक उपाययोजना करण्यात आल्या. प्रमुख चौकांमध्ये पोलिसांची उपस्थिती ठेवण्यात आली होती. जिल्हा अप्पर पोलीस अधीक्षक प्रेरणा कट्टे, सहाय्यक पोलीस अधीक्षक प्रशांत डगळे यांच्या मार्गदर्शनाखाली पोलिस अधिकारी आणि कर्मचाऱ्यांनी बंदोबस्ताची जबाबदारी सांभाळली.
——————
चौकट : ( नगरपालिका प्रशासनाकडून मूर्ती संकलनाची व्यवस्था )
पर्यावरणपूरक पद्धतीने गणेशमूर्तींचे विसर्जन व्हावे यासाठी नगरपालिका प्रशासनाने शहरात विविध ठिकाणी मूर्ती संकलन केंद्रांची व्यवस्था केली होती. शहरात दहा ठिकाणी मूर्ती संकलन केंद्रे उभारण्यात आली होती. अनेक गणेशभक्तांनी या केंद्रांवर गणेशमूर्ती दान करून प्रशासनाच्या पर्यावरणपूरक उपक्रमाला प्रतिसाद दिला.
याशिवाय काही गणेश मंडळे व भाविकांनी चंद्रभागा वाळवंटातील हौदामध्ये तसेच उपनगरातील नागरिकांनी येथील यमाई तलावा मध्ये गणेशमूर्तींचे विसर्जन केले. विसर्जनाच्या ठिकाणीही भाविकांची मोठी गर्दी झाली होती.
——————-
चौकट : ( भक्तिमय वातावरणात उत्सवाची सांगता )
गेल्या बारा दिवसांपासून घराघरांत आणि सार्वजनिक गणेश मंडळांमध्ये सुरू असलेल्या गणेशोत्सवाची अनंत चतुर्दशीच्या दिवशी भावपूर्ण वातावरणात सांगता झाली. गणरायाच्या आगमनापासून ते विसर्जनापर्यंत विविध धार्मिक, सांस्कृतिक आणि सामाजिक कार्यक्रमांनी शहरातील वातावरण उत्साहाने भारून गेले होते. गणरायाला निरोप देताना अनेकांच्या डोळ्यांत अश्रू होते, तर ‘पुढच्या वर्षी लवकर या’च्या जयघोषाने वातावरण भावूक झाले होते. भक्तांनी विघ्नहर्त्या गणरायाकडे सुख, समृद्धी, आरोग्य आणि सर्वांच्या कल्याणाची प्रार्थना करीत पावसाळ्याच्या हंगामातील उरलेल्या दिवसांमध्ये तरी मोठा पाऊस येवून दुष्काळाचे सावट दूर होवू दे अशी प्रार्थना करीत पुढील वर्षी लवकर आगमनाचे निमंत्रण दिले.
