सोलापूर – शहर गुन्हे शाखेच्या पोलीस पथकाने सोलापुरात दिवसा व रात्री घरफोडी करणाऱ्या रेकॉर्डवरील एका सराईत गुन्हेगारास अटक करून सव्वा लाख रुपये किमतीचा मुद्देमाल हस्तगत केला आहे .
दिपक वैकुंठ श्रीगण (वय २३ वर्ष, रा. भारत नगर, शिंदे शाळेच्या पाठीमागे, जुना विडी घरकुल, सोलापुर) असे अटक केलेल्या सराईत गुन्‍हेगाराचे नाव आहे.
मार्च महिन्यामध्ये जुना विडी घरकुल येथे दोन चोऱ्या झाल्या होत्या. अंबादास मधुकर पल्‍ली यांच्‍या बंद घराचे कुलूप तोडून सोन्‍याचे दागिने व रोख रक्कम चोरण्यात आली होती. तसेच दुसऱ्या एका घराचे कुलूप तोडून लॅपटॉपची चोरी झाली होती. याबाबत एमआयडीसी पोलिसात गुन्हे दाखल आहेत. याप्रकरणी शहर गुन्हे शाखेचे वरिष्ठपोलिस निरीक्षक अरविंद माने यांनी या गुन्‍ह्याचा अधिक तपास करण्यासाठी सहा. पोलिस निरीक्षक शैलेश खेडकर यांना सूचना केल्या होत्या. त्‍यानुसार तपास करताना या पथकातील पोलिस आबाजी सावळे यांना माहिती मिळाली की घरफोडी करणारा सराईत आरोपी दिपक श्रीगण हा शास्‍त्री नगर येथील बसस्‍टॅण्डजवळ चोरीचे सोने विक्री करण्यासाठी थांबला आहे. त्‍यानुसार खात्री करुन खेडकर व त्‍यांच्‍या पथकाने सदर ठिकाणी जावून दिपक श्रीगण याला ताब्‍यात घेतले. त्‍याच्‍याकडे सखोल चौकशी केली असता घरकुल येथील दोन्‍ही घरफोडी त्यानेच केल्याचे कबूल केले. त्‍याच्‍याकडून १ लाख १९ हजार रुपयांचा मुद्देमाल हस्तगत करण्यात आला.
ही कामगिरी पोलिस आयुक्‍त एम. राजकुमार, पोलिस उपायुक्‍त डॉ. आश्विनी पाटील, सहा. पोलिस आयुक्‍त दिलीप पवार, वरिष्ठ पोलिस निरीक्षक अरविंद माने यांच्‍या मार्गदर्शनाखाली सहाय्यक पोलीस निरीक्षक शैलेश खेडकर, पोलीस आमलदार संदिप जावळे, अनिल जाधव, आबाजी सावळे, विठ्ठल यलमार, उमेश पवार, महेश पाटील, प्रकाश गायकवाड, मच्‍छिंद्र राठोड यांनी पार पाडली आहे .
