सोलापूर – जिल्ह्याच्या विकासाला गती देण्यासाठी जिल्हा वार्षिक योजना (सर्वसाधारण व एससीपी) अंतर्गत २०२६-२७ या आर्थिक वर्षासाठी जिल्हा परिषदेच्या सर्व विभागप्रमुखांनी दि. १० जुलै रोजी शुक्रवारपर्यंत प्रारूप आराखडा तयार करण्याच्या सूचना जिल्हा परिषद अध्यक्ष दीपक वैद्य आणि उपाध्यक्ष इंद्रजीत पवार यांनी मंगळवारी झालेल्या डी.पी.सी आढावा बैठकीत दिल्या.
यावेळी मुख्य कार्यकारी अधिकारी कुशल जैन, अतिरिक्त मुख्य कार्यकारी अधिकारी संदीप कोहिनकर, उप मुख्य कार्यकारी अधिकारी सूर्यकांत भुजबळ, कृषी व पशुसंवर्धन सभापती रामाप्पा चिवडशेट्टी, महिला व बालकल्याण सभापती अमृता वाघे आदींसह सर्व विभाग प्रमुख, खात्याचे अधिकारी कर्मचारी उपस्थित होते.
या आढावा बैठकीत शिक्षण, बांधकाम, लघुपाटबंधारे, आरोग्य, सामान्य प्रशासन आणि पशुसंवर्धन या विभागांना मोठ्या प्रमाणात निधीचे नियोजन करण्यात येत असून, जिल्ह्यातील पायाभूत सुविधा, शैक्षणिक गुणवत्ता, ग्रामीण रस्ते, सिंचन आणि आरोग्य सेवा सक्षम करण्यावर प्रशासनाचा भर देणार असल्याचे सांगण्यात आले आहे. २०२६-२७ साठी शिक्षण, लघुपाटबंधारे, बांधकाम – क्रमांक १ आणि क्रमांक २, आरोग्य, तसेच सामान्य प्रशासन विभागाला प्रस्तावित निधी देण्यात येणार आहे.
दरम्यान, याशिवाय महिला व बालकल्याण, समाजकल्याण, कृषी, ग्रामपाणी पुरवठा आणि पशुसंवर्धन विभागांनाही आवश्यक निधीचे नियोजन करण्यात आले आहे. आराखड्याच्या तुलनेत मंजूर निधीत काही प्रमाणात कपात होत असल्याचेही सांगण्यात येत आहे. त्यामुळे प्रस्तावित विकासकामांच्या प्रत्यक्ष अंमलबजावणीसाठी अधिकाधिक निधी मंजूर करून घेण्याचे आव्हान प्रशासनासमोर असणार आहे.
सन २०२१-२२ च्या तुलनेत सोलापूर जिल्ह्याच्या प्रस्तावित निधीत लक्षणीय वाढ झाल्यास विकासकामांना अधिक चालना मिळण्याची अपेक्षा जिल्हा परिषद अध्यक्ष दीपक वैद्य यांनी व्यक्त केली आहे.
जिल्ह्याच्या सर्वांगीण विकासासाठी तयार करण्यात आलेला हा आराखडा आगामी काळातील विकासाची दिशा निश्चित करणारा मानला जात असून ग्रामीण भागातील पायाभूत सुविधा, शिक्षण, सिंचन आणि आरोग्य सेवांमध्ये सुधारणा घडवून आणण्यास तो महत्त्वाचा ठरणार असल्याचे जिल्हा परिषद उपाध्यक्ष इंद्रजीत पवार यांनी सांगितले.
