‘दक्षिण’च्या बैठकीमध्ये नागरीकांच्या ज्वलंत समस्यांकडे दुर्लक्ष

सोलापूर – तब्बल चार वर्षानंतर दक्षिण सोलापूर पंचायत समितीची मासिक सभा पार पडली. यावेळी सभापती संदिप टेळे व गटविकास अधिकारी मनोज राऊत यांच्यासह सर्व पंचायत समिती सदस्य व अधिकारी उपस्थित होते. यावेळी नागरिकांच्या समस्या व तक्रारीकडे दुर्लक्ष करीत अधिकाऱ्यांची मर्जी संभाळण्यासाठीच सदस्यांची बैठक झाल्याची चर्चा सुरू आहे.  पंचायत समितीची पहिलीच बैठक असल्यामुळे सर्व सदस्यांनी चार वर्षांच्या कामाचा व खर्चित निधीचा आढावा घेत नागरीकांच्या समस्येविषयी प्रशासनाला धारेवर धरणे गरजेचे असताना त्याकडे दुर्लक्ष झाल्याचे दिसून येते. पहिल्याच बैठकीत अधिकार्‍यां विरोधात बोलू नका असा आदेश पक्षश्रेष्ठीकडून आल्याचे सांगण्यात येत आहे. त्यामुळे सदस्यांनी पहिल्याच बैठकीत दक्षिण मधील नागरिकांच्या तक्रारी , अडचणी व समस्यांकडे दुर्लक्ष केल्याची चर्चा आहे. त्यामुळे नूतन सदस्य अधिकाऱ्यांवर व प्रशासनावर वचक निर्माण करून शासनाच्या योजना यशस्वीपणे राबविणार का ? असा सवाल उपस्थित करण्यात येत आहे.
      २०२२ नंतर तब्बल चार वर्षे पंचायत समितीवर प्रशासक राज्य होते. यावेळी अनेक गटविकास अधिकाऱ्यांनी मनमानी कारभार करीत नागरिकांच्या विकासाचे पैसे अन्यत्र वळविले आहेत. तसेच त्या निधीचा गैरवापर करून मोठ्या प्रमाणात भ्रष्टाचार केला आहे. शिवाय लोकप्रतिनिधी नसल्यामुळे गटविकास अधिकार्‍यांनी नागरिकांच्या तक्रारी व अडचणींना केराची टोपली दाखवत त्याकडे दुर्लक्ष केला आहे. वारंवार पाठपुरावा केल्यानंतरही गट विकास अधिकारी नागरिकांच्या तक्रारी सोडविण्यात अपयशी ठरल्याचे दिसून येते. त्यामुळे दक्षिण सोलापूर पंचायत समितीच्या मासिक बैठकीत नागरिकांच्या तक्रारीवर चर्चा होणे अपेक्षित असताना व अधिकाऱ्यांना धारेवर न धरता थातुरमातुर आढावा घेऊन  बैठक पार पडल्याची चर्चा सुरू आहे . या बैठकीतील अढावाविषयी सदस्यांना विचारले असता उडवाउडवीची उत्तरे मिळाल्याने सदस्यही गंभीर नसल्याचे दिसून येते.
   दक्षिण मध्ये घरकुलची अपूर्ण कामे , लाभार्थ्यांची बिल काढण्यासाठी वारंवार हेलपाटे,   नवीन विहिरी परवानगी प्रलंबित, विकास निधीच्या  बिलांसाठी कर्मचारी व अधिकाऱ्यांकडून होणारी आर्थिक पिळवणूक, साहित्य वाटपातील भ्रष्टाचार, दक्षिणमधील शाळांची दुरावस्था व शिक्षकांची गैरहजेरी, मागासवर्गीय व इतर मागासवर्गीय वसतीगृहांमधील विद्यार्थ्यांची दयनीय अवस्था तसेच गटविकास अधिकारी व  कर्मचार्‍यांचे कार्यालयातील गैरहजरी यासह इतर अनेक प्रश्नांवर मासिक बैठकीत चर्चा होणे अपेक्षित असताना ” अनुभवी व हुशार” सदस्यांकडूनही जाणिवपूर्वक दुर्लक्ष झाल्याचे दिसून येते. त्यामुळे सदस्यांची पहिलीच बैठक “फुसका बार” ठरल्याची चर्चा रंगू लागली आहे.
सभापती संदीप टेळे यांनी यापूर्वी पंचायत समिती सदस्य व उपसभापती म्हणून काम केला असून त्यांच्याकडून प्रशासनाला धारेवर धरून नागरिकांच्या कामाला प्राधान्य देण्याची अपेक्षा व्यक्त होती. मात्र प्रशासनाच्या आढावाशिवाय कोणतेही धोरणात्मक निर्णय या बैठकीत झाल्याचे दिसून येत नाही . शिवाय मंद्रूप ग्रामसेवक बदली सह अनेक नियमबाह्य ठराव करण्याचाही प्रयत्न या बैठकीत झाल्याची चर्चा सुरू आहे . त्यामुळे मासिक बैठक म्हणजे केवळ उपस्थित सदस्य व अधिकार्‍यांची गप्पा ठरल्याचे बोलले जात आहे.
….
चौकट
….
सभापतीने धोरणात्मक निर्णयासाठी गटविकास अधिकारी व विविध विभाग प्रमुख यांच्यावर विशेष जबाबदारी सोपवणे गरजेचे आहे. प्रशासनावर वचक ठेवण्यासाठी कठोर भूमिका घ्यावी लागणार आहे . सीना-भीमा खोऱ्यासह मुस्ती — तांदूळवाडी परिसरातील नागरिक बीडीओंना भेटण्यासाठी कार्यालयात आले असताना बीडीओसह विभाग प्रमुखही भेटत नसल्यामुळे लाभार्थ्यांचे वेळ व पैसा वाया जात आहे. यामुळे प्रशासनातील अधिकारी निगरगट बनले असून  लाभार्थ्यांचे आर्थिक हेळसांड होत आहे . म्हणून सभापती टेळे व सदस्य यांनी प्रशासनावर वचक ठेवण्यासाठी कठोर निर्णय घेण्याची  अपेक्षा व्यक्त करण्यात येत आहे.
….
  मंद्रूपच्या नागरीकांकडून ग्रामसेवक जोडमोटे यांच्याबद्दल अनेक तक्रारी करण्यात आली आहेत. नागरीकांच्या तक्रारीकडे दुर्लक्ष करून केवळ ग्रामपंचायतच्या पत्राची दखल घेण्यात आल्याने बीडीओ राऊत व सदस्याविषयी नाराजी व्यक्त करण्यात येत आहे.