अंबड तालुक्यात मतदार यादी शुद्धीकरण व नवमतदार नोंदणीची कामे सुरु

अंबड तालुक्यात मतदार यादी शुद्धीकरण व नवमतदार नोंदणीची कामे सुरु
तभा वृत्तसेवा
अंबड प्रतिनिधी बाळासाहेब गावडे
19 जुलै अंबड तहसील प्रशासनामार्फत मतदान केंद्रांची तपासणी कामे सुरू आहेत . जिल्हाधिकारी डॉ श्रीकृष्ण पांचाळ, उपजिल्हा निवडणूक अधिकारी शशिकांत हदगल यांच्या मार्गदर्शनानुसार शुक्रवारी तहसीलदार चंद्रकांत शेळके यांनी अंबड शहरातील मतदान केंद्राची पाहणी केली . अंबड तालुका घनसावंगी व बदनापूर या दोन विधानसभा मतदारसंघांमध्ये विभागला गेलेला आहे . घनसावंगी विधानसभा मतदारसंघात तालुक्यातील 100 मतदान केंद्र येतात , ज्यामध्ये 45978 पुरुष मतदार 41875 स्री मतदार असे एकूण 87,553 मतदार आहेत .

बदनापूर विधानसभा मतदारसंघात तालुक्यातील 136 मतदान केंद्र असून त्यामध्ये 62,370 पुरुष मतदार 57,971 स्त्री मतदार असे एकूण 1,20,342 मतदार आहेत . तहसीलदार चंद्रकांत शेळके यांनी निवडणूक नायब तहसीलदार मिलिंद शिनगारे यांच्यासह दिनांक 19 जुलै रोजी अंबड शहरातील मतदान केंद्रांना भेटी दिल्या व त्या मतदान केंद्रावर उपलब्ध असलेल्या सुविधांची पाहणी केली . मतदान केंद्रावर स्वच्छतागृह , रॅम्प , पाणी यासह इतर आवश्यक बाबी उपलब्ध करून देण्याबाबतच्या सूचना दिल्या .

दिनांक 18 जुलै रोजी विधानसभा निवडणुक 2024 च्या पार्श्वभूमीवर निवडणूक निर्णय अधिकारी दीपक पाटील यांच्या मार्गदर्शनाखाली नायब तहसीलदार निवडणूक मिलिंद शिनगारे व पर्यवेक्षक भरत मस्के यांचेकडून मतदान केंद्राची तसेच मतदान केंद्रावर उपलब्ध असलेल्या सुविधांची तपासणी करण्यात आली . यावेळी मतदान केंद्र क्रमांक 132 लखमापुरी, मतदान केंद्र क्रमांक 131 कुक्कडगाव , मतदान केंद्र क्रमांक 135 बेलगाव , मतदान केंद्र क्रमांक 133 व 134 सुखापुरी , मतदान केंद्र क्रमांक 175 व 176 रुई , मतदान केंद्र क्रमांक 177 व 178 वडीकाळ्या , मतदान केंद्र क्रमांक 130 मठतांडा , मतदान केंद्र क्रमांक 179 व 180 दाढेगाव तसेच मतदान केंद्र क्रमांक 181 182 व 183 शहापूर तसेच धाकलगाव , टाका , एकनाथ नगर , दूनगाव व बारसवाडा तपासण्यात आले .

यासंबंधी बोलताना चंद्रकांत शेळके, तहसीलदार , अंबड तथा सहाय्यक निवडणूक निर्णय अधिकारी यांनी वयाची 18 वर्षे पूर्ण केलेल्या तसेच अद्याप मतदार यादीत नाव नसलेल्या सर्व मतदारांना आवाहन केले आहे की त्यांनी आपले नाव किंवा यादी भागासाठी नियुक्त करण्यात आलेल्या मतदान केंद्रस्तरीय अधिकारी यांच्याकडे मतदार यादी मध्ये नाव नोंदवावे . मतदार यादीत नाव नोंदणीसाठी पासपोर्ट साईज फोटो ओळखीचा पुरावा व रहिवासी पुरावा आवश्यक असतो.

तहसील कार्यालय अंबड या ठिकाणी मतदार सहायता केंद्र उभारण्यात आले असून मतदार नोंदणी करावी असे आवाहन तहसीलदार चंद्रकांत शेळके यांनी केले आहे . कार्यालयात नायब तहसीलदार निवडणूक मिलिंद शिनगारे , तालुका नोडल अधिकारी व्ही. डी. घुले , भागवत देशमुख यांचे सह महसूल सहायक ताराबाई बर्डे , संगणक परिचालक कैलास पठारे हे उपस्थित असतात .