मोहोळ – माजी उपसभापती स्व.भाऊसाहेब मोरे यांच्या ७८ व्या जयंतीनिमित्त ज्ञानेश्वर मोरे बिगरशेती ग्रामीण पतपुरवठा संस्था वडवळ यांच्या वतीने लोकरत्न भाऊसाहेब मोरे स्मृती व्याख्यानमालेचे आयोजन वडवळ (ता. मोहोळ ) येथे करण्यात आले आहे. बुधवार दि. १ एप्रिल ते शुक्रवार दि. ३ एप्रिल २०२६ या कालावधीत ही तीन दिवसीय व्याख्यानमाला जिल्हा परिषद प्राथमिक केंद्र शाळा वडवळ येथील मैदानात होणार आहे.
बुधवार दि. १ एप्रिल रोजी सायं. ७ वा. पोपटबुवा शिवपुजे खर्गे महाराज आणि आकाशबुवा शिवपुजे खर्गे महाराज यांच्या शुभहस्ते व्याख्यानमालेचे उदघाटन होईल. यावेळी नूतन जि.प. सदस्य सचिन जाधव, विमलताई खताळ, बालाजी नरुटे, लखन शिंदे यांचा सत्कार होणार आहे. कार्यक्रमाच्या अध्यक्षस्थानी महाराष्ट्र राज्य सहकार परिषदेचे अध्यक्ष राजन पाटील असणार आहेत. प्रमुख अतिथी म्हणून माजी आमदार यशवंत माने उपस्थित असणार आहेत. सायं. ७.३० वा. व्याख्यानमालेचे पहिले पुष्प राहुल गिरी (गेवराई) हे गुंफणार आहेत. संस्काराची शिदोरी वर्तमान पिढीची जबाबदारी हा त्यांच्या व्याख्यानाचा विषय आहे.
गुरुवार दि.२ एप्रिल रोजी लोकरत्न भाऊसाहेब मोरे जयंती निमित्त सायं. ७.०० वा. अभिवादन कार्यक्रम संपन्न होणार आहे. यावेळी मोहोळ पंचायत समितीचे नूतन सभापती अस्लम चौधरी, उपसभापती उल्का पाटील, पं . स . सदस्य संजीव खिलारे, कोमल अवताडे, नीलम मसलकर, पार्वती गावडे, अमेरिका कापसे यांचा सत्कार होणार आहे. या कार्यक्रमाच्या अध्यक्षस्थानी माजी जि. प. उपाध्यक्ष बाळराजे पाटील हे तर प्रमुख अतिथी म्हणून भाजपा जिल्हाध्यक्ष शशिकांत नाना चव्हाण उपस्थितराहतील . सायं. ७.३० वा. व्याख्यानमालेचे दुसरे पुष्प दि. २ एप्रिल रोजी प्रबोधनकार गणेश शिंदे (अहिल्यानगर) हे गुंफणार आहेत हे जीवन सुंदर आहे हा त्यांच्या व्याख्यानाचा विषय आहे.
शुक्रवार दि. ३ एप्रिल रोजी सायं. ७.०० वा. छ. शिवाजी महाराज यांना पुण्यतिथीनिमित्त अभिवादन कार्यक्रम होईल. यावेळी कृषी उपसंचालक राजपत्रित अधिकारी वर्ग १ पदी निवड झाल्याबद्दल मयुरी सर्जेराव गायकवाड यांचा सत्कार होईल. ७.३० वा. तिसरे पुष्प शिवव्याख्याते ज्ञानदेव काशिद (बीड) हे गुंफणार आहेत. असा राजा होणे नाही हा त्यांच्या व्याख्यानाचा विषय आहे. अध्यक्षस्थानी उपनिबंधक सहकारी संस्था मोहोळ सुमित कवडे व प्रमुख अतिथी म्हणून सहाय्यक निबंधक एस. टी. तेलंगरे असणार आहेत.
राजकारण, समाजकारण आणि सहकार या तीनही क्षेत्रात आपल्या कार्याचा ठसा उमटविणारे स्व.भाऊसाहेब मोरे प्रगतशील विचाराचे होते. आजच्या युवकांना त्यांच्या सामाजिक कार्यातून प्रेरणा मिळावी व प्रबोधनात्मक विचारमंथनातून सुदृढ समाज घडावा यासाठीच या तीन दिवसीय व्याख्यानमालेचे आयोजन करण्यात आले आहे. या कार्यक्रमास सर्वांनी सहकुटुंब उपस्थित राहण्याचे आवाहन पतसंस्थेचे चेअरमन राहुल मोरे यांनी केले आहे. कार्यक्रम यशस्वी करण्यासाठी बापूसाहेब दळवे, सूर्यकांत मोरे, शाहू धनवे, सुशांत मोरे, निलेश व्यवहारे, संतोष पवार, दीपक काकडे, अमोल शिंदे, लक्ष्मण मळगे, बापू शिंदे व भाऊसाहेब मोरे प्रतिष्ठानचे सर्व कार्यकर्ते परिश्रम घेत आहेत.
