सोलापूर – आषाढी वारी २०२६ दरम्यान लाखो वारकऱ्यांच्या आरोग्याची कोणतीही गैरसोय होऊ नये, यासाठी जिल्हा आरोग्य विभागाने व्यापक नियोजन केले असून, यंदा ४५०० औषध किटचे वितरण करण्यात येणार आहे. वारी मार्गावरील आरोग्य सेवा अधिक सक्षम करण्याच्या उद्देशाने या किटचे नियोजन करण्यात आले असून, त्याच्या वितरणासाठी स्वतंत्र समितीची स्थापना करण्यात आली आहे. यासमितीच्या कामकाजाची संपूर्ण जबाबदारी साहाय्यक जिल्हा आरोग्य अधिकारी यांच्याकडे सोपविण्यात आल्याची माहिती जिल्हा आरोग्य अधिकारी डॉ सतीश कोपूरवाड यांनी दिली.
वारीदरम्यान वारकऱ्यांना तातडीची आणि प्रभावी आरोग्य सेवा उपलब्ध व्हावी, यासाठी प्रत्येक वैद्यकीय पथकाला आवश्यक औषध किट पुरविण्यात येणार आहे. या किटमध्ये ताप, अंगदुखी, सर्दी, खोकला, जुलाब, उलट्या, निर्जलीकरण, अॅलर्जी, जखमा तसेच इतर सामान्य आजारांवरील औषधांसह प्राथमिक उपचारासाठी लागणारे साहित्य उपलब्ध असेल. त्यामुळे किरकोळ आजारांवर त्वरित उपचार करणे शक्य होणार असून, वारकऱ्यांना मोठ्या आरोग्य केंद्रात जाण्याची आवश्यकता कमी होईल.
औषध किटचे वितरण पारदर्शक आणि नियोजनबद्ध पद्धतीने व्हावे, यासाठी स्थापन करण्यात आलेली समिती संपूर्ण प्रक्रियेवर देखरेख ठेवणार आहे. कोणत्या आरोग्य पथकाला किती किट द्यायचे, कोणत्या ठिकाणी अतिरिक्त साठा ठेवायचा आणि गरजेनुसार तातडीने पुरवठा कसा करायचा, याचे नियोजन समितीकडून करण्यात आले आहे. वारी मार्गावरील प्रत्येक आरोग्य केंद्रात औषधांचा पुरेसा साठा उपलब्ध राहील, याची दक्षताही घेण्यात आली आहे.
याशिवाय, जिल्हा आरोग्य विभागाने जीवनरक्षक औषधे, इंजेक्शन्स, ओआरएस पावडर, आयव्ही फ्लुईड्स, ऑक्सिजन, सलाईन, बालकांसाठी आवश्यक सिरप तसेच विविध संसर्गजन्य आजारांवरील औषधांचा मोठ्या प्रमाणात साठा उपलब्ध करून ठेवला आहे. तसेच एचबीएसएजी, व्हीडीआरएल, सर्पदंश निदान किट यांसारख्या आवश्यक निदान किटही आरोग्य पथकांना उपलब्ध करून देण्यात आल्या आहेत.
वारकऱ्यांच्या आरोग्य सुरक्षेसाठी डॉक्टर, परिचारिका, औषधनिर्माण अधिकारी, आरोग्य कर्मचारी आणि आपत्कालीन वैद्यकीय पथके २४ तास सेवेत राहणार आहेत. यांसह उष्माघात, हृदयविकाराचा झटका, अॅनाफिलॅक्सिस, सर्पदंश किंवा इतर गंभीर आपत्कालीन परिस्थिती उद्भवल्यास तातडीने उपचार करता यावेत, यासाठी विशेष व्यवस्था करण्यात आली आहे.
कोट
४५०० औषध किटचे नियोजन
आषाढी वारी ही केवळ धार्मिक परंपरा नसून लाखो भाविकांचा श्रद्धेचा महोत्सव आहे. त्यामुळे वारकऱ्यांना सुरक्षित, निरोगी आणि दर्जेदार आरोग्य सेवा देण्यासाठी जिल्हा आरोग्य विभागाने केलेले हे नियोजन महत्त्वपूर्ण मानले जात आहे. विशेषतः ४५०० औषध किटचे नियोजन, त्यासाठी स्वतंत्र समितीची स्थापना आणि साहाय्यक जिल्हा आरोग्य अधिकाऱ्यांकडे सोपविण्यात आलेली जबाबदारी यामुळे वारी मार्गावरील आरोग्य सेवा अधिक सक्षम आणि परिणामकारक होणार असल्याचा विश्वास जिल्हा आरोग्य अधिकारी डॉ सतीश कोपूरवाड यांनी व्यक्त केला आहे.
