सोलापूर – मराठी रंगभूमी समृद्ध करणाऱ्या नव्या नाट्यलेखनाला प्रोत्साहन देण्यासाठी अखिल भारतीय मराठी नाट्य परिषदेतर्फे दरवर्षीप्रमाणे यंदाही ‘नाट्यलेखन प्रोत्साहन योजना’ राबविण्यात येत आहे. बदलते वास्तव, समाज आणि माणसांच्या संघर्षाचे प्रतिबिंब नव्या नाटकांमधून रंगभूमीवर उमटणे ही आजची गरज आहे. नवोदित व प्रतिभावान लेखकांच्या मनात असलेल्या संकल्पनांना रंगमंचापर्यंत नेण्यासाठी योग्य व्यासपीठ उपलब्ध करून देणे, हा या योजनेमागील मुख्य उद्देश असल्याचे नाट्य परिषदेचे अध्यक्ष प्रशांत दामले यांनी सांगितले.
या उपक्रमाच्या माध्यमातून मराठी रंगभूमीला आशयघन, दर्जेदार व काळाशी संवाद साधणारे नवे साहित्य मिळावे, अशी नाट्य परिषदेची संकल्पना आहे. या योजनेत निवडण्यात आलेल्या पारितोषिक प्राप्त संहिता प्रकाशित करण्याचा नाट्य परिषदेचा मानस आहे. त्यामुळे सर्व अनुभवी, नवोदित आणि रंगभूमीवर काहीतरी नवे सांगण्याची इच्छा असलेल्या नाट्यलेखकांनी या योजनेमध्ये मोठ्या संख्येने सहभागी व्हावे, असे आवाहन नाट्य परिषदेच्या वतीने करण्यात आले आहे.
या योजनेसाठी पाठवण्यात येणारी नाट्यसंहिता ही मराठी भाषेतील, दोन अंकी आणि पूर्णपणे नव्याने लिहिलेली असणे आवश्यक आहे. सदर संहिता यापूर्वी कोणत्याही नावाने नोंदणीकृत, प्रकाशित अथवा तिचे कोणतेही नाट्यप्रयोग झालेले नसावेत. लेखकांनी आपल्या नाट्यसंहितेच्या दोन टंकलिखित किंवा सुवाच्य अक्षरात लिहिलेल्या प्रती २० ऑक्टोबर २०२६ पूर्वी ‘अखिल भारतीय मराठी नाट्य परिषद, यशवंतराव चव्हाण नाट्य संकुल, मनमाला टँक रोड, माटुंगा, मुंबई ४०००१६’ या मध्यवर्ती कार्यालयात पाठवायच्या आहेत.
या योजनेअंतर्गत प्रथम पारितोषिक रु. २१,०००/-, द्वितीय रु. १५,०००/-, तृतीय रु. ११,०००/- आणि उत्तेजनार्थ रु. ३,०००/- देण्यात येणार असून, संगीत नाटकासाठी रु. ११,०००/- चे विशेष पारितोषिक दिले जाईल. स्पर्धेचे प्रवेश अर्ज नाट्य परिषदेच्या www.natyaparishad.org या संकेतस्थळावर उपलब्ध असून अधिक माहितीसाठी ८५९१७०६८८७ या क्रमांकावर संपर्क साधण्याचे आवाहन अखिल भारतीय मराठी नाट्य परिषद सोलापूर शाखेचे अध्यक्ष प्रकाश यलगुलवार यांनी केले आहे.
