सांगोला – सनातन संस्थेच्या वतीने सांगोला शहरातील महादेव गल्ली येथील दत्त मंदिरात दि.८ ते १२ मे असे ५ दिवसीय सनातन संस्कार प्रशिक्षण वर्ग शिबिर आयोजित करण्यात आले होते. या शिबिरात शहरातील विविध वयोगटातील ४५ विद्यार्थी सहभागी झाले होते.
या शिबिरात आपली संस्कृती, परंपरा यांचे आपल्या जीवनात असलेले महत्व यावर भर देण्यात आला होता. सूर्यनमस्कार, व्यायाम, हिंदू संस्कृतीनुसार देवळात दर्शन कसे घ्यावे, थोरांचा आदर कसा करावा, अभ्यास कसा करावा, वाढदिवस संस्कृतीनुसार कसा साजरा करावा, कपाळावर टिळा लावण्याचे महत्व यासारख्या धर्माचरणाच्या गोष्टीचे लहान मुलांकडून प्रत्यक्ष कृती करून घेऊन त्याचे आध्यात्मिक महत्व स्पष्ट करण्यात आले.
यावेळी विविध छोट्या-छोट्या आध्यात्मिक ज्ञान वाढविणाऱ्या स्पर्धा घेऊन त्यातून यशस्वी मुलांना बक्षीस देण्यात आली. मुलांनी घेतलेला सहभाग आणि त्यांनी आचरणात आणलेल्या कृती पाहून पालकांनीही या शिबिराचे खूप कौतुक केले. या उपक्रमासाठी दत्त मंदिर ट्रस्टचे लऊळकर कुटुंबीयांनी मोलाचे सहकार्य केले.
