सोलापूर : 30 कोटींच्या ठेवी प्रकरणी उपमहापौर ज्ञानेश्वरी देवकर यांनी आयुक्तांना दिलेल्या निवेदनाची माहिती आम्हाला नव्हती. समन्वयाच्या अभावामुळे हा प्रकार घडला असला, तरी त्यांनी केलेली कृती चुकीची आहे, असे शहराध्यक्ष रोहिणी तडवळकर यांनी पत्रकार परिषदेत स्पष्ट केले.
स्थायी समितीच्या बैठकीत 30 कोटींच्या ठेवी बंधन बँकेऐवजी आयसीआयसीआय बँकेत ठेवण्याचा निर्णय सभापती रंजीता चाकोते यांनी घेतला होता. या निर्णयाला उपमहापौर ज्ञानेश्वरी देवकर यांच्यासह काही नगरसेवकांनी विरोध दर्शवत ठेवी स्टेट बँक ऑफ इंडिया (एसबीआय) मध्ये ठेवाव्यात, अशी मागणी आयुक्तांकडे निवेदनाद्वारे केली आहे.याबाबत विचारले असता तळवळकर म्हणाल्या, देवकर यांनी महापौर, शहराध्यक्ष, सभागृह नेते नरेंद्र काळे तसेच पक्षाच्या इतर पदाधिकाऱ्यांना विश्वासात घेणे आवश्यक होते. मात्र, त्यांनी कोणालाही याबाबत कल्पना दिली नाही. या प्रकरणी पक्षाध्यक्ष म्हणून मी त्यांना जाब विचारणार आहे. तसेच महापौर आणि सभागृह नेतेही त्यांच्याकडे यासंदर्भात विचारणा करतील, असेही त्यांनी सांगितले.
महापौर , सभागृह नेते आणि कॅबिनेट बरोबर चर्चा करायला हवी होती. यापूर्वी चर्चा झाली होती.
माहिती न घेता अशा प्रकारचे निवेदन देणे पूर्णपणे चुकीचे आहे. या प्रकरणी पक्षश्रेष्ठींशी चर्चा करून पुढील निर्णय घेतला जाईल, असेही रोहिणी तडवळकर यांनी स्पष्ट केले.
स्थायी समिती सभापती रंजीता चाकोते म्हणाल्या, याबाबत पत्र देण्यापूर्वी उपमहापौर ज्ञानेश्वरी देवकर यांनी आमच्याशी चर्चा तरी करायला हवी होती. आम्ही स्थायी समितीने पैसे कुठे सुरक्षित राहतील हे लक्षात घेऊन निर्णय घेतलाय. प्रशासनाची बंधन बँकेची शिफारस असताना पालिकेला अधिकाधिक व्याज मिळेल तसेच हे पैसे अधिक सुरक्षित राहतील या काळजीने ते आयसीआयसीआय बँकेत ठेवले आहेत.
अलीकडेच आयसीआयसीआय बँकेने महानगरपालिकेला दोन घंटागाड्या सीएसआर फंडातून भेट दिल्या आहेत. त्याबाबतचे वृत्तांत फोटो आणि नावांसह प्रसिद्ध झाले. ते ताजे असतानाच उपमहापौर देवकर यांनी काल आयुक्तांकडे थेट पत्र दिल्याने सध्या या विषयावरून राजकीय उठा ठेवीला भारतीय जनता पार्टीला सामोरे जावं लागणार असल्याचे दिसून येते.
उपमहापौर माझी मैत्रीण,
चर्चा करणार : सभापती चाकोते
स्थायी समितीने चर्चा करून हा निर्णय घेतला आहे. असे असताना असे घडणे हा सभागृहाचा अवमान आहे.
उपमहापौर ज्ञानेश्वरी देवकर यांच्या समवेत सकाळी कार्यक्रमाला एकत्र उपस्थित होतो मात्र त्यानंतर त्यांनी ते निवेदन दिले. याबद्दल कल्पना नव्हती. उपमहापौर देवकर या माझी चांगली मैत्रीण असून त्यांच्याशी भेटून चर्चा करणार असल्याचे स्थायी समिती सभापती रंजीता चाकोते यांनी सांगितले.
——
