मंगळवेढा – आगामी राज्य विधिमंडळाच्या हिवाळी अधिवेशनात आदिवासी महादेव कोळी जमातीला न्याय द्यावा, मंगळवेढा (ता. मंगळवेढा, जि. सोलापूर) येथे जाचक अटी लावून नाकारले जाणारे जात प्रमाणपत्र तात्काळ मिळावे, तसेच मंगळवेढा येथे आद्य क्रांतिकारक वीर राघोजी भांगरे यांच्या स्मारकासाठी जागा व निधी मंजूर करावा, अशी जोरदार मागणी ‘आदिवासी जमातीचा महर्षि वाल्मिकी संघ (रजि) महाराष्ट्र’ यांच्या वतीने करण्यात आली आहे. याबाबतचे सविस्तर निवेदन राज्याचे मुख्यमंत्री मा. ना. श्री. देवेंद्रजी फडणवीस साहेब यांना मंगळवेढा प्रांताधिकारी व तहसीलदार कार्यालयामार्फत सादर करण्यात आले आहे.
संघाचे संस्थापक अध्यक्ष मा. गणेश अंकुशराव यांच्या मार्गदर्शनाखाली आणि पश्चिम महाराष्ट्र युवा प्रदेश अध्यक्ष मा. श्री. अरविंद ज्ञानेश्वर नाईकवाडी यांच्या नेतृत्वाखाली हे निवेदन देण्यात आले.
या निवेदनात नमूद केले आहे की, मंगळवेढा तालुक्यात प्रशासनाकडून जाणीवपूर्वक जाचक अटी लावून आणि अनावश्यक पुराव्यांची मागणी करून समाज बांधवांचे व विद्यार्थ्यांचे जात प्रमाणपत्राचे अर्ज मोठ्या प्रमाणावर फेटाळले (Reject) जात आहेत. यामुळे विद्यार्थ्यांचे शैक्षणिक व नोकरीचे मोठे नुकसान होत असून, या जाचक अटी तात्काळ रद्द करून पात्र अर्जदारांना विनाविलंब जात प्रमाणपत्र व जात वैधता प्रमाणपत्र (Validity) देण्यात यावे.
तसेच, भारतीय स्वातंत्र्यलढ्यात ब्रिटिश सत्तेविरुद्ध सशस्त्र लढा उभारणारे आद्य क्रांतिकारक वीर राघोजी भांगरे यांचा जाज्वल्य इतिहास भावी पिढीला प्रेरणा देणारा आहे. त्यांचे भव्य स्मारक उभारण्यासाठी मंगळवेढा (ता. मंगळवेढा, जि. सोलापूर) येथे मध्यवर्ती ठिकाणी शासकीय जागा उपलब्ध करून द्यावी व बांधकामासाठी विशेष निधी मंजूर करावा. यासोबतच समाज बांधवांसाठी स्वतंत्र आर्थिक विकास महामंडळ, उच्च शिक्षणासाठी शिष्यवृत्ती व वसतिगृह सुविधा, घरकुल योजना आणि प्रत्येक तालुक्याच्या ठिकाणी ‘महर्षि वाल्मिकी सांस्कृतिक भवन’ उभारण्याची मागणीही या निवेदनाद्वारे करण्यात आली आहे.
या निवेदनाच्या प्रती उपमुख्यमंत्री साहेब, आदिवासी विकास मंत्री साहेब, जिल्हाधिकारी सोलापूर, तसेच मंगळवेढा प्रांताधिकारी व तहसीलदार कार्यालयाला सादर करण्यात आल्या आहेत. आगामी हिवाळी अधिवेशनात शासनाने या सर्व मागण्यांवर सकारात्मक निर्णय घेऊन समाजाला न्याय द्यावा, अशी मागणी संघटनेच्या वतीने करण्यात आली आहे.
Views: 8