माढा – नगरपंचायत प्रशासनाने बुधवारी सकाळी आठ वाजता नगरपंचायत जागेत असलेले गाळ्यांच्या समोर गाळेधारकांनी केलेले अतिक्रमण कडेकोट पोलीस बंदोबस्तात काढले या कालावधीत छत्रपती शिवाजी महाराज चौकात काही काळ तणावाचे वातावरण निर्माण झाले होते.
अतिक्रमण काढण्यास आलेल्या कर्मचारी व गाळेधारकांमध्ये काही ठिकाणी शाब्दिक बाचाबाची झाली. नगरपंचायत मुख्याधिकारी नेहा कंठे यांनी या अतिक्रमण संदर्भात गाळेधारकांना कायदेशीर नोटीसा देऊन अतिक्रमण काढून घेण्यास सूचना केल्या होत्या.
त्यानुसार गाळेधारकांनी अतिक्रमण काढण्यास सुरुवात केली होती परंतु काही गाळेधारक अतिक्रमण काढण्यास तयार नसल्याने ते अतिक्रमण नगरपंचायतने जीसीबी द्वारे काढून घेतले आहे. माढा नगरपंचायला व्यापारी गाळ्यांसाठी एक कोटीचा निधी मंजूर झाला असून या निधीतून शहरात व्यापारी संकुल उभारण्यात येणार आहे.
यावेळी नगराध्यक्षा ॲड. मिनलताई साठे उपनगराध्यक्षा कल्पनाताई जगदाळे व नगरसेवकांनी माढा नगरपंचायतीस व्यापारी गाळ्यांसाठी निधी मंजूर झाला असून या ठिकाणी नवीन गाळे उभारण्यात येणार आहे नवीन गाळे उभारणीतून अनेकांना व्यवसायासाठी संधी मिळणार आहे. म्हणून या कामात सहकार्य करण्याचे आवाहन केले.
या अतिक्रमण कारवाईत अनुचित प्रकार घडू नये यासाठी ४ पोलीस अधिकारी २२ अंमलदार व १०होमगार्ड यांचा बंदोबस्त ठेवण्यात आला होता.
या गोष्टीकडे लक्ष दिले असते तर हे टाळता आले असते….
प्रशासनाने अतिक्रमण करण्यास मज्जाव केला असता तर ही वेळ आली नसती.
प्रशासनाने अतिक्रमण होतानाच रोखले असते तर आज ही वेळ आलीच नसती गाळेधारकांनी अतिक्रमण केले असले तरी ज्या त्या वेळेस ग्रामपंचायत किंवा आत्ता नगरपंचायत प्रशासनाने अतिक्रमण होत असतानाच त्या ठिकाणी अटकाव केला असता तर आज अतिक्रमण काढण्याची वेळच प्रशासनावर आली नसती. येणाऱ्या काळात प्रशासनाने ही बाब गांभीर्याने घेऊन पुढील काळात कारवाई करण्यापेक्षा अतिक्रमणच होऊ देऊ नये याकडे लक्ष देणे अत्यंत गरजेचे आहे.
अतिक्रमण काढण्यास आलेल्या दोन जीसीबी मशीनवर कारवाई
माढा वैराग व माढा सोलापूर या रस्त्यालगत असलेल्या व्यापारी गाळ्यांन समोरील अतिक्रमण काढण्यास दोन जेसीबी बोलवण्यात आले होते. परंतु त्या जीसीबी मशीनने टॅक्स व इन्शुरन्स न भरलेले आढळल्याने आरटीओ अधिकाऱ्याने त्यांना दंड करून कारवाई केली आहे. त्याचवेळी नगरपंचायत प्रशासनाने कागदपत्राची पूर्तता असलेल्या जीसीबी कडून या ठिकाणी अतिक्रमणावर कारवाई केली.
नवीन गाळ्यांचे बांधकाम तात्काळ सुरू,अनेक बेरोजगारांना मिळणार संधी.
नवीन व्यापारी गाळण्यासाठी एक कोटीचा निधी मंजूर झाला आहे. तेव्हापासून गाळ्यांसमोर झालेले अतिक्रमण प्रकरण सामंजस्याने सोडवण्याचा प्रयत्न केला जात होता. पण काही गाळेधारकांच्या आडमुठेपणामुळे ही मोहीम राबवावी लागली.
गाळेधारकांच्या व्यवसायाचा विचार करून केवळ मूळ गाळ्यांच्या समोरील व मागील अतिक्रमण काढले आहे.
आता नवीन गाळ्यांचे काम सुरू होईल.
ॲड. मिनलताई साठे, माढा नगराध्यक्षा.
गाळ्यांचा निधी माघारी जाऊ नये म्हणून कारवाई गरजेची,
अतिक्रमण काढण्याबाबत सर्व कायदेशीर प्रक्रिया पूर्ण केली आहे. स्ट्रक्चरल ऑडिटमध्ये जुने गाळे धोकादायक आढळले होते.नवीन गाळ्यांसाठी १ कोटीचा निधी प्राप्त झाला असून, तो मुदतीत खर्च व्हावा आणि निधी माघारी जाऊ नये म्हणून ही कारवाई करणे अनिवार्य होते.
नेहा कंठे, मुख्याधिकारी.
