सोलापूर : रात्री बेरात्री होणाऱ्या पाणीपुरवठामुळे महिलांसह नागरिकांना मोठा त्रास सहन करावा लागतो तत्काळ रात्रीचा पाणीपुरवठा बंद करा शहराला दोन दिवसात पाणीपुरवठा करण्याचा प्रयत्न करावा. महापालिका अधिकाऱ्यांना सोलापूर शहराविषयी आत्मीयता आहे की नाही, असा सवाल उपस्थित करत महापालिकेला लागणाऱ्या निधीसाठी पाठपुरावा करण्यात येईल, असे आदेश विधानसभा उपाध्यक्ष अण्णा बनसोडे यांनी नागपूर येथील बैठकीत दिले.
नागपूर येथे विधानसभा अधिवेशनादरम्यान उपाध्यक्ष अण्णासाहेब बनसोडे यांच्या अध्यक्षतेखाली महापालिकेचे अधिकारी, राष्ट्रवादी काँग्रेस अजित पवार गटाचे पदाधिकारी तसेच पत्रकारांची महत्त्वाची बैठक घेतली. सोलापूर महापालिकेच्या संदर्भातील पाणी प्रश्नासह विविध विषयांवर चर्चा झाली. विधानसभा उपाध्यक्ष अण्णा बनसोडे यांच्या दालनात सोलापूरच्या विविध प्रश्नांवर बैठकीचे आयोजन करण्यात आले होते. यावेळी मंचावर राष्ट्रवादीचे प्रदेश उपाध्यक्ष आनंद चंदनशिवे, किसन जाधव
राष्ट्रवादीचे शहराध्यक्ष संतोष पवार, कार्याध्यक्ष जुबेर बागवान, माजी नगरसेवक तोफिक शेख, गणेश पुजारी आदी उपस्थित होते. महापालिका आयुक्त डॉ. सचिन ओम्बासे हे या बैठकीला व्हिडिओ कॉन्फरन्सच्या माध्यमातून उपस्थित होते. तसेच महापालिका उपायुक्त आशिष लोकरे, सहायक संचालक नगररचना मनीष भिष्णूरकर, उपअभियंता शशिकांत वाघमारे, जयंत वाणी, योगेश डोके, राजकुमार पाटील , दिलीप पवार, सचिन पवार आदींसह विविध विभागाचे अधिकारी उपस्थित होते.
या बैठकीत सोलापूरच्या पाणी प्रश्नावर अण्णा बनसोडे यांनी विचारलेल्या प्रश्नावर अधिकाऱ्यांनी किस पाडला. तर सोलापूर महानगरपालिकेचा पाणीपुरवठा विभाग महाराष्ट्र जीवन प्राधिकरणाकडे वर्ग करण्याची मागणी माजी उपमहापौर प्रवीण डोंगरे यांनी केली. तसेच नगरअभियंता आणि सार्वजनिक आरोग्य अभियंता यांना बदलून शासनाचे अधिकारी देण्याची मागणीसुद्धा डोंगरे यांनी केली. महिलांसाठी त्रासदायक ठरणारा रात्रीचा पाणीपुरवठा बंद करण्याची मागणी माजी नगरसेवक आनंद चंदनशिवे, किसन जाधव आणि तौफिक शेख यांनी केली.
सोलापूर शहराला एक दिवसाआड पाणी पुरवठा कसा करता येईल या संदर्भात आरोग्य अभियंता चौबे यांना बनसोडे यांनी विचारले. त्यावर समाधानकारक उत्तर शोभे यांना देता आले नाही. यामुळे पंचवीस वर्षे सेवा करूनही तुम्हाला शहराविषयी आत्मीयता आहे की नाही अशा शब्दात सुनावले. सोलापूरचा रात्रीचा पाणीपुरवठा बंद होऊन सुरळीत होणार असेल तर सोलापूर महानगरपालिकेचा पाणीपुरवठा विभाग महाराष्ट्र जीवन प्राधिकरणकडे देण्याचा विचार करणार नाही,असेही अण्णा बनसोडे यांनी स्पष्ट केले
नगर अभियंता आकुलवार यांना धारेवर धरले
रमाई आवास योजने संदर्भात बोलताना ‘शासनाच्या योजना जनतेपर्यंत पोहोचविण्यासाठी अधिकाऱ्यांना तिथे बसविले असून योजना नागरिकांपासून वंचित ठेवण्यासाठी अधिकाऱ्यांना तिथे बसविले नाही ‘ या शब्दात या बैठकीत विधानसभेचे उपाध्यक्ष अण्णा बनसोडे यांनी सोलापूर महापालिकेच्या नगरअभियंता सारिका आकुलवार यांना धारेवर धरले. रमाई आवास योजनेचे अर्ज प्रलंबित ठेवू नका. लोकांना लाभ मिळू द्या, असे आदेश अण्णा बनसोडे यांनी दिले.
दीड वर्षात दोन दिवसाआड पाणीपुरवठा करणार : आयुक्त सचिन ओम्बासे
या बैठकीत रात्रीचा पाणीपुरवठा बंद न करता त्याची वेळ कमी करण्याचा शब्द सार्वजनिक आरोग्य अभियंता व्यंकटेश चौबे यांनी दिला तर मनपा आयुक्त सचिन ओम्बासे यांनी दीड ते दोन वर्षात सोलापूरकरांना दोन दिवसाआड पाणीपुरवठा करण्यासाठी प्रयत्न करणार असल्याची ग्वाही विधानसभेचे उपाध्यक्ष अण्णा बनसोडे यांना दिली. दरम्यान या बैठकीत सोलापूरच्या विविध प्रश्नांवर चर्चा झाली.
सोलापूरच्या पाणीपुरवठ्यासाठी आवश्यक तो निधी दिला जाईल : अजित पवार
दरम्यान विधानसभेचे उपाध्यक्ष अण्णा बनसोडे यांनी उपमुख्यमंत्री अजित पवार यांची भेट घेतली. सोलापूरच्या पाणी प्रश्नासाठी आवश्यक निधी या सह विविध विषयांवर चर्चा केली. यावेळी उपमुख्यमंत्री अजित पवार यांनी महापालिका आयुक्त यांना फोन लावला. सोलापूरचा पाणी प्रश्नासाठी लागणारा आवश्यक निधी तसेच इतर प्रश्न मार्गी लावणार असल्याची ग्वाही त्यांनी आयुक्तांशी बोलताना दिली. यावेळी प्रदेश उपाध्यक्ष आनंद चंदनशिवे, गणेश पुजारी उपस्थित होते.
श्री सिद्धेश्वर यात्रेपूर्वी पाणीपुरवठा सुरळीत करा
मनपा परिवहन समितीचे माजी सभापती आनंद मास्तर यांनी श्री सिद्धेश्वर यात्रा निमित्ताने पाणीपुरवठा सुरळीत करण्याची मागणी केली. सोलापुरात श्री सिद्धेश्वर यात्रा जानेवारीमध्ये सुरू होत आहे. संक्रांतीच्या या सणादरम्यान शहराचा पाणीपुरवठा सुरळीत ठेवावा. उपाध्यक्ष अण्णा बनसोडे यांनी महापालिका आयुक्त सचिन ओम्बासे यांना दिले.
