शरद पवार खोटं बोलत आहे, २००४ बद्दल शरद पवार यांनी जे सांगितलं ते खोट आहे. तेव्हा राष्ट्रवादीला मुख्यमंत्री पदासाठी संधी होती. त्यावेळी शरद पवारांनी सांगितलं काहीजण नवखे होते. मात्र तसं काही नव्हतं. तेव्हा मी मुख्यमंत्री पदासाठी इच्छूक नव्हतो, असा गौप्यस्फोट अजित पवार यांनी केला आहे. २००४ मध्ये राष्ट्रवादीकडे मुख्यमंत्री पदासाठी योग्य उमेदवार नव्हता. तसेच भुजबळांना मुख्यमंत्री केलं असतं तर पक्ष फुटला असता, असं वक्तव्य शरद पवार यांनी केले होते. या वक्तव्यावर अजित पवारांनी प्रतिक्रिया देत मोठा गौप्यस्फोट केला आहे.
मुंबईत राष्ट्रवादीने बैठक आयोजित केली होती. यावेळी अजित पवार बोलत होते. यावेळी त्यांनी हा गौप्यस्फोट केला आहे. अजित पवार म्हणाले की, शरद पवार यांनी २००४ बाबत जे सांगितलं ते धादांत खोट आहे. मला त्यावेळी वाटत होतं की, भुजबळ मुख्यमंत्री होतील. त्यावेळी मी मुख्यमंत्री होण्यासाठी इच्छूक नव्हतो. आपण २००४ साली मुख्यमंत्र्यांची संधी होती. आता आपले वरिष्ठ जे सांगत आहेत की त्यावेळी काहीजण नवे होते. तसं काही नव्हतं. १९९१ मध्येच पद्मसिंह पाटील मुख्यमंत्री होणार होते, मात्र सुधाकरराव नाईक पवारांचं ऐकत नव्हते. त्यामुळे मुख्यमंत्री आपलं ऐकणार नाहीत, अशी भीती पवारांना होती.
कल्याणीनगर अपघात प्रकरणी बोलताना ते म्हणाले, मुंबईत अनधिकृत होर्डिंग्ज अपघात झाला. त्यात अनेक निष्पाप लोकांचा जीव गेला. डोंबिवलीमध्ये देखील असेच काहीसे झाल्याचे समोर आले. या प्रकरणी अनधिकृत कामाबाबत मी निर्देश दिले आहेत. कुणालाही न वाचवता करवाई करा. कल्याणीनगर अपघात प्रकरणी ज्या मुलाने अपघात केला त्याच्या बापाला ताब्यात घेतलं. त्याच्या बापाच्या बापाला देखील ताब्यात घेतलं आहे. पोलीस तपास करत आहेत. आम्ही सरकार म्हणून पूर्ण जबाबदारी घेतली आहे. पोलीस, डॉक्टर, सस्पेंड केले आहेत. सगळ्या कामात लक्ष घातलं गेलं आहे, असे अजित पवार म्हणाले.
