सोलापूर – “महिला आरोग्य समित्या या केवळ सरकारी योजनांची अंमलबजावणी करणाऱ्या समित्या नसून समाजाचे आरोग्य जपणाऱ्या सक्षम यंत्रणा आहेत. आपल्या परिसरातील नागरिकांपर्यंत आरोग्यविषयक माहिती पोहोचवणे, आरोग्य सेवांमधील अडचणी ओळखून त्यावर पाठपुरावा करणे आणि लोकसहभागातून आरोग्य व्यवस्था अधिक सक्षम करण्यामध्ये महिला आरोग्य समित्या महत्त्वाची भूमिका बजावत आहेत,” असे प्रतिपादन दिवाणी न्यायाधीश तथा जिल्हा विधी सेवा प्राधिकरणाचे सचिव मा. अमोलकुमार देशपांडे यांनी केले.
अनुसंधान ट्रस्ट–साथी, पुणे, सोलापूर महानगरपालिका आणि अस्तित्व संस्थेच्या संयुक्त विद्यमाने ६ व ७ जुलै रोजी समाजकल्याण केंद्र, रंगभवन चौक, सोलापूर येथे महिला आरोग्य समिती सदस्यांची दोन दिवसीय कार्यशाळा आयोजित करण्यात आली होती. या कार्यशाळेत सोलापूर शहरातील विविध नागरी वस्त्यांमधील २०० हून अधिक महिला आरोग्य समिती सदस्या सहभागी झाल्या होत्या.
या कार्यशाळेतून सोलापूर शहरातील नागरी वस्त्यांमधील आरोग्यविषयक समस्या सोडविण्यासाठी महिला आरोग्य समित्या सक्रियपणे कार्यरत असल्याचे स्पष्ट झाले. सोलापूर महानगरपालिका, अनुसंधान ट्रस्ट–साथी आणि अस्तित्व संस्था यांच्या सहकार्याने शहरातील रामवाडी, विडी घरकुल, जिजामाता व दाराशा या चार नागरी प्राथमिक आरोग्य केंद्रांच्या कार्यक्षेत्रात गेल्या तीन वर्षांपासून महिला आरोग्य समिती सक्षमीकरण कार्यक्रम राबविण्यात येत आहे. या कार्यक्रमामुळे स्थानिक पातळीवर आरोग्य सेवा, जनजागृती आणि समुदाय सहभाग वाढविण्यासाठी महिलांचे प्रभावी नेतृत्व विकसित होत आहे.
कार्यशाळेत महिला आरोग्य समित्यांच्या भूमिका व जबाबदाऱ्यांबरोबरच विविध शासकीय योजनांची आणि कायदेशीर हक्कांची माहिती देण्यात आली. जिल्हा विधी सेवा प्राधिकरणामार्फत उपलब्ध मोफत कायदेशीर सेवांबाबत ॲड. देवयानी किणगी आणि ॲड. सरोजिनी तमशेट्टी यांनी मार्गदर्शन केले. महिला व बाल विकास विभागाच्या वन स्टॉप सेंटरच्या सेवांविषयी शुभांगी कांबळे यांनी माहिती दिली. महिलांशी संबंधित विविध कायद्यांविषयी शकुंतला भालेराव यांनी मार्गदर्शन केले, तर महात्मा फुले जनआरोग्य योजनेची माहिती पर्यवेक्षक अमोल शिंदे यांनी दिली. महिलांमध्ये वाढत्या गर्भाशय मुखाच्या कर्करोगाच्या प्रतिबंध, तपासणी आणि लवकर निदानाचे महत्त्व डॉ. क्षिप्रा पिंजरकर यांनी स्पष्ट केले.
कार्यक्रमाच्या प्रस्तावनेत अस्तित्व संस्थेचे शहाजी गडहिरे यांनी सांगितले की, महिला आरोग्य समित्यांनी आतापर्यंत नागरी वस्त्यांमधील विविध आरोग्यसेवा संबंधी प्रश्नांच्या सोडवणुकीसाठी प्रभावी भूमिका बजावली आहे. भविष्यातही लोकसहभाग अधिक मजबूत करून प्रत्येक वस्तीचे आरोग्य सुधारण्यासाठी महिला आरोग्य समित्यांनी पुढाकार घेणे आवश्यक आहे.
यावेळी अनुसंधान ट्रस्ट–साथी, पुणेचे विनोद शेंडे, रेश्मा कदम,तब्बू नगारे, पल्लवी वडणे, शिवानी बिराजदार,प्रवीण सूर्यगंध यांच्यासह विविध महिला आरोग्य समित्यांच्या सदस्या उपस्थित होत्या.
