सोलापूर – महाराष्ट्र राज्य लॉन टेनिस असोसिएशन व सोलापूर जिल्हा लॉन टेनिस असोसिएशन यांच्या संयुक्त विद्यमाने आयोजित केलेल्या ओॲसिस, प्रिसीजन, इलिझियम-जामश्री व बालाजी अमाईन्स पुरस्कृत महिलांच्या जागतिक मानांकन लॉन टेनिस स्पर्धेचे आयोजन २१ ते २८ डिसेंबर २०२५ या कालावधीत एम. एस. एल. टी. ए. टेनिस सेंटर, जिल्हा क्रीडा संकुल, कुमठा नाका, सोलापूर येथे आयोजित केलेले आहे.
स्पर्धेची एकुण बक्षिस रक्कम ३०,०००/- अमेरिकन डॉलर असून स्पर्धेतील खेळाडूंना जागतिक मानांकन गुण देखील प्राप्त होणार आहेत. अशा प्रकारची अंतरराष्ट्रीय स्पर्धा सोलापूरात दहाव्यांदा भरविण्यात येत आहे. ही बाब सोलापूरसाठी अत्यंत अभिमानाची व प्रतिष्ठेची आहे. या स्पर्धेसाठी भारतासह १३ देशातुन एकूण ५६ महिला सहभागी होणार असुन यामध्ये २५ महिला खेळाडू या परदेशी आहेत.
सोलापूर व लगतच्या जिल्हयामध्ये लॉन टेनिस खेळाचा प्रसार व प्रचार व्हावा व सोलापूरचे नांव जागतिक पातळीवर व्हावे या उद्देशाने या स्पर्धा आयोजित केल्याचे जिल्हा संघटनेचे अध्यक्ष राजेश दमाणी यांनी सांगितले.
या स्पर्धेसाठी आंतरराष्ट्रीय टेनीस फेडरेशनने पुण्याच्या शितल अय्यर व नितिन कन्नमवर यांची सामना पर्यवेक्षक तर राज्य संघटनेचे संयुक्त सचिव राजीव देसाई यांची सामना संचालक म्हणून नियुक्ती केलेली आहे.
या स्पर्धेसाठी पंच म्हणून अखिल भारतीय लॉन टेनिस संघटनेने श्रीराम गोखले (पुणे), श्रध्दा दलि (मुंबई), अमित देशपांडे (पुणे), पोन्नुसामी (चेन्नई), अतनु चक्रवर्ती (कलकत्ता), रिया चाफेकर (पुणे) यांची नियुक्ती केलेली आहे.
या स्पर्धेसाठी फिजीओथेरपीस्ट निकिता चव्हाण (पुणे), आनंदी दवे (गुजरात), इव्हेंट मॅनेजर संध्याराणी बंडगर, दळणवळण समन्वयक पुजा संचेती, भोजन व्यवस्था सुनंदा पवार व संतोष पवार पाहणार आहेत. तर व्हेन्यु इंनचार्ज म्हणून सुधीर सालगुडे व पुजा सालगुडे काम पाहणार आहेत.
या स्पर्धेसाठी पुण्याच्या पुजा इंगळे व सोलापूरच्या पार्थसारथी मुंढे यांना मुख्य फेरीत तर सोलापूरच्या आकृती सोनकुसरे, युरोपस्थित (आईसलँड) कर्हाडच्या गरिमा काळुगडे व मुंबईच्या डॅनिका फर्नांडो यांना पात्रता फेरीत थेट प्रवेश देण्यात आला असल्याचे सोलापूर जिल्हा लॉन टेनिस संघटनेचे मानद सचिव राजीव देसाई यांनी जाहिर केले.
स्पर्धेचा उदघाटन समारंभ सोमवार २२ डिसेंबर रोजी सायंकाळी ५ वाजता एम राज कुमार , पोलीस आयुक्त , सोलापूर यांच्या शूभहस्ते व सुंदर अय्यर , अंतरिम महासचिव , अखिल भारतीय लॉन टेनिस संघटना तसेच मानद सचिव महाराष्ट्र राज्य लॉन टेनिस संघटना यांच्या प्रमुख उपस्थितीत होणार आहे.
स्पर्धेत उत्कृष्ट बॉल पिकरची सेवा बजावणा-या मुला-मुलींना भेटवस्तु देऊन गौरवण्यात येईल. स्पर्धेचे पात्रता फेरीचे सामने दि. २१ व २२ डिसेंबर रोजी तर मुख्य फेरीचे सामने दि. २३ ते २८ डिसेंबर पर्यंत सकाळी ९ ते संध्याकाळी ५ वाजेपर्यंत खेळविले जातील.
या स्पर्धेच्या आयोजनासाठी आली पंजवानी, मेहुल पटेल, ब्रिजेश गांधी, केशव रेड्डी, सुहास अदमाने, श्रीधर देवसानी, असिम सिंदगी, सुनिल मदन, राजेश पवार, अभिजित टाकळीकर, डॉ. वैभव मेरु, डॉ साजिद सय्यद, उज्वल कोठारी, परेश शहा, संतोष फाटक , सतीश भोसले यांचे सहकार्य लाभले.
