बार्शी – छत्रपती संभाजी महाराज व महात्मा बसवेश्वर महाराज यांच्या जयंतीनिमित्त गुरुवार दि. १४ मे रोजी सकाळी ७ ते ५ या वेळात ओन्ली समाजसेवा बहुउद्देशीय संस्था, बार्शी आयोजित श्रीराम निवास, वाणी प्लॉट, बार्शी येथे रक्तदान शिबीर संपन्न झाले. या शिबिराचे उदघाटन छत्रपती संभाजी महाराज व महात्मा बसवेश्वर महाराज यांच्या प्रतिमांचे पूजन व दीपप्रज्वलन बार्शी तालुका पोलीस स्टेशनचे सहा. पोलीस निरीक्षक महेश माने, युवा उद्योजक श्री. विशाल वाणी, श्री. अमोल डिसले, वैभव पाटील (प्रदेशाध्यक्ष जनसेवा युवक संघटना) आणि पत्रकार भ. के. गव्हाणे व माजी नगरसेवक बापूसाहेब वाणी यांच्या शुभहस्ते संपन्न झाले.
ओन्ली समाजसेवा बहुउद्देशीय संस्था गेल्या सहा वर्षांपासून १४ मे ला रक्तदान शिबीर यशस्वीपणे आयोजित करीत आहे. गेल्या वर्षी एकूण १५१ रक्तदात्यांनी ऐच्छिक रक्तदान केले होते. श्री. महेश माने यांनी आपल्या मनोगतात रक्तदानाचे महत्व विशद केले. रक्तदान हे श्रेष्ठ दान, महादान आहे, असे सांगितले आणि सर्वांना रक्तदान करण्याचे आवाहन केले. सदर शिबिरामध्ये एकूण २०१ रक्तदात्यांनी ऐच्छिक रक्तदान केले.
सदरचे रक्तदान शिबीर यशस्वी करण्यासाठी संस्थेचे अध्यक्ष राहुल वाणी, उपाध्यक्ष संतोष शेळगांवकर, सचिव अजय तिवारी, सहसचिव नागनाथ सोनवणे, खजिनदार माणकोजी ताकभाते व सर्व सदस्य आणि सर्व महिला सदस्य यांनी परिश्रम घेतले. कार्यक्रमाचे प्रस्ताविक आणि आभार प्रा. डॉ.चंद्रकांत उलभगत यांनी मानले.
