सार्वजनिक शांततेस धोका असल्याने जिल्हादंडाधिकारी पृथ्वीराज बी.पी यांनी त्याच्या स्थानबद्धतेचा प्रस्ताव मंजूर केला. वाढत्या गुन्हेगारीला आळा घालण्यासाठी पोलिस अधीक्षक सोमय मुंडे यांच्या आदेशान्वये एमआयडीसी पोलिसांनी महाराष्ट्र झोपडपट्टीदादा (एमपीडीए) कायद्यांतर्गंत लातूर जिल्ह्यातील आकाश अण्णासाहेब होदाडे, वय 25 वर्ष, राहणार कवठा तालुका औसा. जिल्हा लातूर सध्या राहणार न्यू भाग्यनगर,लातूर याच्याविरुद्ध कारवाई करण्यात आली आहे.
लातूर जिल्ह्याच्या इतिहासामधील ही पहिलीच कारवाई आहे. एमपीडीए कायद्यांतर्गंत कारवाईचा शहरातील कायदा व सुव्यवस्था धोक्यात आणणार्या गुन्हेगारांवर वचक निर्माण करण्यासाठी, त्यांची गुन्हेगारी रोखण्यासाठी लातूर पोलिसांकडून कडक प्रतिबंधात्मक कारवाई करण्यात येत आहे. पोलीस ठाणे एमआयडीसी हद्दीतील धोकादायक गुंड आकाश अण्णासाहेब होदाडे (वय 25) याला एमपीडीए कायद्याखाली एक वर्षासाठी स्थानबद्ध करुन त्याची रवानगी जिल्हा कारागृहात करण्यात आली आहे. जिल्ह्यातील एमपीडीए नुसार करण्यात आलेली कारवाई ही पहिलीच कारवाई आहे. या व्यक्तीविरूध्द अनेक गंभीर गुन्ह्यांची नोंद आहे. त्यामध्ये खून, जीवे मारण्याचा प्रयत्न, कट रचून-भीती घालून खंडणी उकळणे, मालमत्तेचे नुकसान, जबरी चोरी, गंभीर दुखापत करणे, दहशत निर्माण करुन मालमत्तेचे नुकसान करणे, शिवीगाळ करणे, बेकायदेशीर जमाव गोळा करुन दहशत करणे, असे गुन्हे त्याच्यावर दाखल आहेत.
त्याच्याकडून सार्वजनिक शांततेस धोका असल्याने पोलीस अधीक्षक सोमय मुंडे यांचे निर्देशान्वये अपर पोलीस अधीक्षक डॉ. अजय देवरे, उपविभागीय पोलीस अधिकारी लातूर शहर जितेंद्र जगदाळे यांचे मार्गदर्शनात पोलीस ठाणे एमआयडीसीचे पोलीस निरीक्षक संजीवन मिरकले, सहाय्यक पोलीस निरीक्षक दिपाली गीते पोलीस उपनिरीक्षक राष्ट्रपाल लोखंडे, अंमलदार विष्णू वायगावकर यांनी नमूद आरोपी विरुद्ध एमपीडीए कायद्यानुसार प्रस्ताव तयार करून जिल्हाधिकारी यांच्याकडे मंजुरी पाठविण्यात आला होता. जिल्हादंडाधिकारी बी.पी. पृथ्वीराज यांनी त्याच्या स्थानबद्धतेचा प्रस्ताव मंजूर केला आहे.
महाराष्ट्र झोपडपट्टीदादा, हातभट्टीवाले, औषधी द्रव्यविषयक गुन्हेगार व धोकादायक व्यक्ती, दृक्श्राव्य कलाकृतीचे विनापरवाना प्रदर्शन करणार्या व्यक्ती यांच्या विघातक कृत्यास आळा घालण्याबाबत अधिनियम 1981 म्हणजेच एमपीडीए (महाराष्ट्र प्रोहिबिशन ऑफ डेंजरस अॅक्टिविटी) होय. सराईत गुन्हेगार किंवा सार्वजनिक कायदा, सुव्यवस्था भंग करणार्या कोणत्याही व्यक्तीविरुद्ध एमपीडीएची कारवाई करता येते. या कायद्यानुसार सराईत गुन्हेगाराला एक वर्षासाठी कारागृहात स्थानबद्ध करण्यात येते.
