मंगळवेढा – बसस्थानकावर बसमध्ये चढत असताना एका निराधार व वृध्द महिलेच्या गळ्यातील 60 हजार रुपये किंमतीचे सोन्याचे दागिने चोरुन नेल्याचा प्रकार घडला असून या प्रकरणी अज्ञात चोरट्याविरुध्द गुन्हा दाखल झाला आहे.
पोलीस सुत्रांनी दिलेली माहिती अशी,यातील फिर्यादी तथा वृध्द महिला मालन जगन्नाथ रणदिवे (वय 77,रा.बोराळे) ही घरी एकटीच रहावयास असून दि.13 ऑक्टोबर रोजी सकाळी 7 वाजता तिची मुलगी निर्मला वाघमारे (रा.सोलापूर) हिच्याकडे गेली होती. तद्नंतर दुपारी 3 वाजता सोलापूर वरुन बोराळे गावी जाण्याकरिता फिर्यादी निघाली व सायंकाळी 4.40 वाजता मंगळवेढा बसस्थानकावर पोहचली. सायंकाळी 5 वाजता मंगळवेढा-अरळी जाणारी बस असल्याने त्या एस.टी.बस मध्ये चढत असताना चोरट्याने गर्दीचा फायदा घेवून 60 हजार रुपये किंमतीचे सोन्याचे मणीमंगळसुत्र चोरुन नेले. सदर वृध्द महिला एस.टी.मध्ये सीट वर बसल्यानंतर फिर्यादीच्या लक्षात आले गळ्यात असलेले सोन्याचे मणी दिसून आले नाहीत.
घडला प्रकार नातवाला सांगीतल्यानंतर नातू व आजी यांनी मंगळवेढा पोलीस स्टेशन मध्ये येवून अज्ञात चोरट्याविरुध्द गुन्हा दाखल केला आहे. दरम्यान मंगळवेढा बसस्थानकावर प्रवाशांचे दागीने व मोबाईल चोरण्याची मालीका अखंड सुरु असून या घडनेमुळे बसस्थानकावरील प्रवाशी धास्तावले आहेत. यापुर्वीही चक्क एका पोलीसाच्या पत्नीचे महालक्ष्मीसाठी काढून ठेवलेल्या दागीन्याची पर्स पाच लाख रुपये किंमतीच्या दागीन्यासह चोरुन नेली होती. या घटनेला जवळपास वर्ष होवूनही पोलीसाच्या पत्नीच्या दागीन्याचा तपास पोलीसालाच लागत नसल्यामुळे दुसर्यांचा तपास ते पोलीस कसे लावणार? हा एक गंभीर प्रश्न बनू पाहत आहे.
यापुर्वी मोबाईल,दागीने चोरीच्या घटना होवूनही त्याचाही तपास लागलेला नाही. त्यामुळे पोलीस नेमके आपले कर्तव्य चोराच्या बाजूने बजावतात की, जनतेच्या बाजूने असा संतापजनक सवाल नागरिकामधून करुन पोलीसांच्या कर्तव्याबाबत तीव्र संताप व्यक्त होत आहे.
