सोलापूर : सोलापूर महापालिकेची सार्वत्रिक निवडणूक तोंडावर असतानाच इतर पक्षातील पदाधिकारी व माजी लोकप्रतिनिधींना भाजपमध्ये घेऊ नये म्हणून भाजप कार्यकर्ते आणि पदाधिकाऱ्यांचा तीव्र विरोध आणि आंदोलने होत आहेत तर दुसरीकडे भाजपचे माजी नगरसेवक असलेले रवी गायकवाड यांनी थेट भाजपच्या प्राथमिक सदस्यत्वाचा राजीनामा दिला आहे. यामुळे भाजपासह राजकीय वर्तुळात उलट – सुलट चर्चा होत आहे.
भाजपाचे माजी नगरसेवक रवी(बॉस) गायकवाड यांनी भाजप पक्षातील प्राथमिक सदस्यत्वाचा राजीनामा दिला आहे. शहराध्यक्षा रोहिणी तडवळकर यांची भेट घेऊन त्यांनी आपल्या राजीनाम्याचे पत्र दिले आहे. आज बुधवारी सकाळी ते भाजपा पक्ष कार्यालयात दाखल झाले. शहराध्यक्ष रोहिणी तडवळकर यांची भेट घेऊन त्यांनी आपल्या राजीनाम्याचे पत्र त्यांच्याकडे दिले.
भारतीय जनता पार्टीचा सन २०१७ पासून नगरसेवक म्हणून कार्य करीत होतो. गेल्या कांही वर्षापासून भाजपाचे केंद्रीय मंत्री अमीत शहा, राज्याचे मंत्री चंद्रकांत पाटील वगैरे नेते संविधान निर्माते विश्वरत्न डॉ. बाबासाहेब आंबेडकर व इतर मागासवर्गीय नेत्यांवर अपशब्दात अपमान करीत आहेत. हे आमच्या मनाला पटत नसल्याने भारतीय जनता पार्टीच्या प्राथमिक सदस्यत्वाचा राजीनामा सादर करीत आहे, असे माजी नगरसेवक रवी गायकवाड यांनी राजीनामा पत्रात म्हटले आहे.
महापालिकेच्या रणधुमाळीपूर्वी दिलेल्या या राजीनामामुळे राजकीय वर्तुळात उलट – सुलट चर्चा होत आहे. अंतर्गत मतभेद आहेत का ? याबाबत सध्या तरी अधिकृत भूमिका समोर आलेली नाही. पण या निर्णयामुळे मागासवर्गीय समाजातील प्रभागात नक्कीच फटका बसणार असे बोलले जात आहे.यावर आता भाजपाचे नेते काय तोडगा काढणार ? याकडे लक्ष लागले आहे.
