सोलापूर – सोलापूर महापालिकेच्या निवडणुकीसाठी काँग्रेस, राष्ट्रवादी, शिवसेना, माकप, मनसे या पक्षांची महाविकास आघाडी करण्याचा निर्णय झाला आहे. या निवडणुकीसाठी आघाडीअंतर्गत माकप २० जागांची मागणी करणार आहे, अशी माहिती माकपचे ज्येष्ठ नेते तथा माजी आमदार नरसय्या आडम यांनी सोमवारी पत्रकार परिषदेत दिली.
दरम्यान, या संदर्भात आडम यांनी अधिक माहिती देताना सांगितले की, शिवसेना नेते चंद्रकांत खैरे यांच्या नेतृत्वाखाली नुकतीच सोलापुरात बैठक होऊन त्यात महाविकास आघाडी करून महापालिकेची निवडणूक लढण्याचा निर्णय घेण्यात आला. यानुसार माकप आपल्या ताकदीनुसार २० जागांची मागणी करणार आहे. प्रभाग क्रमांक ९,१३, १४, १५, १६, १८, २२ यामध्ये माकप निवडणूक लढविणार आहे. महाविकास आघाडी अंतर्गत आमच्या पक्षाला १२ ते १४ जागा मिळतील, यापैकी सहा ते सात उमेदवार निवडून येण्याची खात्री आहे, असे नरसय्या आडम म्हणाले.
महापालिका निवडणुकीसाठी मार्क्सवादी कम्युनिस्ट पक्ष ५० टक्के जागा या नवीन चेहरे, तरुण तसेच इंजिनिअर, वकील यांच्यासाठी ठेवणार आहे. याशिवाय अन्य जागा या कामगार चळवळीतल्या कार्यकर्त्यांसाठी देण्यात येणार आहे. महाविकास आघाडीला ५२ ते ५४ जागा मिळतील असा अंदाज आहे. महाविकास आघाडीची सत्ता आल्यास महापौरपद एका वर्षासाठी करून पाच वर्षाच्या कालावधीत एकदा माकपला महापौरपदाची संधी मागू, असे नरसय्या आडम यांनी सांगितले.
पत्रकार परिषदेला ॲड. एम. एच, शेख, व्यंकटेश कोंगारी, युसुफ मेजर, म.हनीफ सातखेड, नसीमा शेख, कामिनी आडम, नलिनी कलबुर्गी, रंगप्पा मरेड्डी, ॲड.अनिल वासम, नसीमा शेख, दत्ता चव्हाण, लिंगव्वा सोलापुरे, सुनंदा बल्ला आदी उपस्थित होते.
सिटू’चे महाअधिवेशन येत्या ३१ डिसेंबर व १ जानेवारी रोजी विशाखापट्टणम येथे होणार आहे. या अधिवेशनात केंद्र सरकारने गत महिन्यात लागू केलेल्या चार श्रमसंहितेला विरोध दर्शनासाठी आंदोलनाची रूपरेषा ठरविण्यात येणार आहे. काही वर्षांपूर्वी मोदी सरकारने केलेल्या शेतकरीविरोधी कायदा विरोधात नवी दिल्ली येथे शेतकऱ्यांनी सुमारे एक वर्ष आंदोलन केले. यामध्ये ७२६ जणांचा बळी गेला. या आंदोलनाची दखल घेत सरकारला कायदे मागे घेणे भाग पडले. याच धर्तीवर आता माकपतर्फे चार श्रमसंहिताविरोधात आंदोलन करण्यात येणार आहे, असेही आडम यांनी यावेळी सांगितले.
