पंढरपूर – नगरपरिषदेच्या स्वीकृत नगरसेवकपदी माजी आमदार प्रशांत परिचारक यांच्या नेतृत्वाखालील भाजपा आणि पंढरपूर मंगळवेढा शहर विकास आघाडीकडून तीन स्विकृत नगरसेवकांची नावे मंगळवारी जाहीर करण्यात आली आहेत. या मध्ये माजी नगराध्यक्ष लक्ष्मण पापरकर, सुनील वाळुजकर तसेच सौरभ थिटे यांची वर्णी लागली आहे.दुसरीकडे भालके गटाच्या वाट्याला एक स्विकृत नगरसेवकपद आलेले आहे. मात्र त्यांच्याकडून अद्याप कुणाचेही नाव जाहीर करण्यात आलेले नाहीत.
पंढरपूर नगरपरिषदेच्या निवडणूकीत ३६ नगरसेवकां पैकी २४ जागांवर परिचारकांच्या नेतृत्वाखालील भाजपा आणि पंढरपूर मंगळवेढा शहर विकास आघाडीचे २४ नगरसेवक निवडून आलेले होते. तर भालकें यांच्या नेतृत्वाखालील तिर्थक्षेत्र विकास आघाडीचे ११ नगरसेवक निवडून आलेले होते. एक जागेवर अपक्ष नगरसेवक निवडून आला.
दरम्यान निवडून आलेल्या सदस्यांच्या संख्याबळानुसार परिचारक गटाला तीन आणि भालके गटाच्या वाट्याला एक स्विकृत सदस्यपद आलेले होते. गेल्या दोन,चार दिवसांपासून परिचारक गटातील अनेक जण स्विकृत सदस्यपदी आपली वर्णी लागावी म्हणून आपआपल्या समर्थक कार्यकर्त्यांसह परिचारकांच्या भेटीगाठी घेत होते. माजी आमदार प्रशांत परिचारक, विद्यमान आमदार समाधान आवताडे तसेच युटोपियन शुगर्सचे सर्वेसर्वा उमेश परिचारक यांच्या विचारविनीमयातून अखेर मंगळवारी तीन नावे निश्चित करुन ती जाहीर करण्यात आली. त्यामध्ये माजी नगराध्यक्ष लक्ष्मण शिरसाट, ॲड. सुनील वाळुजकर आणि सौरभ काशिनाथ थिटे
यांची निवड करण्यात आली.
दरम्यान सोलापूर येथील जिल्हाधिकारी कार्यालयात जावून जिल्हा प्रशासनाधिकारी योगेश डोके यांच्याकडे मंगळवारी दुपारी या तिघांकडून आपआपली नामनिर्देशन पत्रे सादर करण्यात आली. यावेळी त्यांच्या समवेत पंढरपूर अर्बंन बँकेचे अध्यक्ष तथा माजी नगराध्यक्ष सतीश मुळे, अर्बंन बँकेचे संचालक हरीश ताठे, पालिकेतील भाजपाचे गटनेते भागवत बडवे तसेच ज्येष्ठ नगरसेवक सुजित कुमार सर्वगोड, अमोल डोके, विश्वनाथ आळगे आणि ओंकार वाळूजकर हे उपस्थित होते.
————–
( तिघां स्विकृत सदस्यांचा अल्प परिचय )
लक्ष्मण शिरसट (पापरकर ) : परिचारकांचे अत्यंत विश्वासू सहकारी, पंढरपूर नगरपरिषदेचे माजी नगराध्यक्ष म्हणून यापूर्वी काम पाहिले. नगरसेवकपदाचा प्रदिर्घ अनुभव. नुकत्याच झालेल्या पालिकेच्या नगराध्यक्षपदाच्या उमेदवार म्हणून भाजपाकडून निवडणूक लढविलेल्या आणि पराभूत झालेल्या शामल शिरसट (पापरकर ) यांचे लक्ष्मण शिरसट (पापरकर) हे पती.
—————
सुनील वाळुजकर : पंढरपूर नगरपरिषदेचे सेवानिवृत्त माजी उपमुख्याधिकारी.पालिकेच्या कामगार संघटनेचे जनरल सेक्रेटरी म्हणून कार्यरत.पालिकेतील प्रशासकीय कामाचा दांडगा अनुभव. सर्वांना बरोबर घेऊन काम करण्याची हातोटी. परिचारकांशी एकनिष्ठ. नुकत्याच झालेल्या नगरपालिकेच्या निवडणूकीत परिचारक गटाकडून नगराध्यक्षदासाठी सुनील वाळुजकर यांच्या पत्नीच्या नावाची शेवटपर्यंत चर्चा होती. मात्र अखेरच्या क्षणी त्यांचे नावे मागे पडून शामल शिरसट यांना उमेदवारी बहाल करण्यात आली.
——————-
सौरभ काशिनाथ थिटे (पाटील) : भाजपा आणि संघाचा एकनिष्ठ कार्यकर्तो. भाजपाचे माजी जिल्हाध्यक्ष काशिनाथ थिटे पाटील यांचा सौरभ हा मुलगा. भिडेगुरुजी यांचा कट्टर धारकरी. सामाजिक कार्यात नेहमीच अग्रेसर, नुकत्याच झालेल्या पालिकेच्या निवडणूकीत प्रभाग क्रमांक ७ मधुन नगरसेवकपदासाठी इच्छुक, उमेदवारी अर्ज दाखल मात्र पक्षाचा आदेश मानुन उमेदवारी मागे घेतली. त्यामुळेच स्विकृतसदस्यपदी वर्णी.
