सोलापूर : राज्यातील औद्योगिक विकासाला गती देण्यासाठी राज्य शासनाने सोलापूरमधील औद्योगिक पायाभूत सुविधांसाठी मोठा निर्णय घेतला आहे. अक्कलकोट रोड औद्योगिक वसाहत आणि होटगी रोडवरील सोलापूर सहकारी औद्योगिक वसाहतीतील एकूण 44 रस्त्यांच्या डांबरीकरणासाठी तब्बल रु. 55.94 कोटींच्या कामांना मुख्यमंत्री देवेंद्र फडणवीस यांच्यामुळे प्रशासकीय व आर्थिक मंजुरी देण्यात आली आहे, अशी माहिती आ. देवेंद्र कोठे यांनी पत्रकार परिषदेत दिली.
या महत्त्वपूर्ण निर्णयाची माहिती देताना आमदार देवेंद्र कोठे म्हणाले, ही मंजुरी महाराष्ट्र औद्योगिक पायाभूत सुविधा निर्मिती व विकास योजना अंतर्गत देण्यात आली असून, यामुळे सोलापूरच्या औद्योगिक परिसरातील वाहतूक व्यवस्था आणि लॉजिस्टिक साखळी अधिक सक्षम होणार आहे.दि. 13 मार्च 2026 रोजी मुख्य सचिवांच्या अध्यक्षतेखाली झालेल्या 13 व्या उच्चस्तरीय समिती बैठकीत हा निर्णय घेण्यात आला. सोलापूर महानगरपालिकेने सादर केलेल्या प्रस्तावास मान्यता देत निधी उपलब्ध करून देण्यास हिरवा कंदील देण्यात आला.
या संदर्भातील शासन निर्णय दि. 28 मार्च 2026 रोजी निर्गमित करण्यात आला आहे.
ही मंजुरी “महाराष्ट्र औद्योगिक पायाभूत सुविधा निर्मिती व विकास योजना” अंतर्गत देण्यात आली असून, यामुळे सोलापूरमधील औद्योगिक वसाहतींतील रस्ते सुविधा मोठ्या प्रमाणात सुधारतील. परिणामी उद्योगांच्या वाहतुकीत सुलभता येऊन गुंतवणूक व रोजगारनिर्मितीला चालना मिळणार आहे, असे आ. कोठे यांनी सांगितले.
मुख्यमंत्री देवेंद्र फडणवीस यांच्यामुळेच केवळ सोलापूर साठी हा ऐतिहासिक आणि विशेष निर्णय घेण्यात आला आहे. मुख्यमंत्री देवेंद्र फडणवीस आणि पालकमंत्री जयकुमार गोरे हे सोलापुरातील उद्योजकांच्या पाठीशी खंबीरपणे उभे आहेत. सोलापुरातील दोन एमआयडीसीमध्ये अनेक वर्षापासून मूलभूत सोयी सुविधांचा अभाव होता मागील वर्षी आगीची दुर्दैवी घटना ही घडली होती. यामुळे या मतदारसंघातील आमदार म्हणून मी शहरातील दोन्ही एमआयडीसीतील रस्ते आणि सोयी सुविधांसाठी निधी मिळण्याची विनंती मुख्यमंत्र्यांकडे केली होती. तांत्रिक अडचणी दूर करत मुख्यमंत्र्यांनी विशेष बाब म्हणून अखेर हा महत्त्वपूर्ण शासन निर्णय मंजूर केला आहे असे सांगत आमदार देवेंद्र कोठे यांनी मुख्यमंत्र्यांसह संबंधित मंत्री आणि वरिष्ठ अधिकाऱ्यांचे आभार मानले.
या पत्रकार परिषदेस महापौर विनायक कोंड्याल , चेंबर ऑफ कॉमर्सचे अध्यक्ष राजू राठी, वस्त्रोद्योग महासंघाचे अध्यक्ष पेंटप्पा गड्डम, नगरसेवक विजय चिप्पा, सिद्धेश्वर कमटम, श्रीनिवास दायमा, नगरसेविका सारिका खजूरगी, स्विय सहाय्यक शैलेश कडदास आदी उपस्थित होते.
कोणत्या कामांसाठी किती निधी ?
अक्कलकोट रोड औद्योगिक वसाहत – 35 रस्त्यांचे डांबरीकरण – खर्च: 50.22 कोटी रुपये,
होटगी रोड औद्योगिक वसाहत (सोलापूर सहकारी औद्योगिक वसाहत)- 9 रस्त्यांचे डांबरीकरण –
खर्च: 5.71 कोटी रुपये, एकूण खर्च: 55.94 कोटी रुपये इतका आहे.
निधी वाटपाची रचना अशी
मंजूर निधी वाटपाची रचना अशी राहणार आहे.
राज्य शासन : 75 टक्के (41.95 कोटी रुपये)
जिल्हा नियोजन व विकास योजना: 12.5 टक्के (6.99 कोटी रुपये)
सोलापूर महानगरपालिका : 12.5 टक्के ( 6.99 कोटी टक्के). हा मंजूर निधी राज्य शासनाकडून उद्योग संचालनालयामार्फत आहरित करून आभासी ठेव खात्यात जमा केला जाईल. त्यानंतर महाराष्ट्र औद्योगिक विकास महामंडळ (एमआयडीसी) मार्फत तो सोलापूर महानगरपालिकेला वितरित केला जाणार आहे.
महापालिकेकडे राहणार कामाची जबाबदारी
या प्रकल्पाची अंमलबजावणी सोलापूर महानगरपालिका करणार असून, सर्व कामे नियोजित कालावधीत पूर्ण करण्याची जबाबदारी महापालिकेवर राहणार आहे. भविष्यातील रस्ते देखभाल व दुरुस्तीची जबाबदारीही महापालिकेलाच पार पाडावी लागणार आहे. तसेच, प्रकल्प खर्चात वाढ झाल्यास अतिरिक्त आर्थिक भार देखील महापालिकेलाच उचलावा लागणार आहे.
औद्योगिक विकासाला चालना
या प्रकल्पामुळे औद्योगिक वसाहतींमधील रस्ते सुविधा सुधारल्याने उद्योगांना वाहतूक, कच्चा माल पुरवठा आणि उत्पादन वितरण अधिक सुलभ होणार आहे. परिणामी, सोलापूरमध्ये गुंतवणूक वाढ, रोजगारनिर्मिती आणि स्थानिक अर्थव्यवस्थेला मोठी चालना मिळण्याची अपेक्षा व्यक्त केली जात आहे.
अधिक उद्योग आकर्षित करण्यासाठी
पायाभूत सुविधा महत्त्वाची : आ. देवेंद्र कोठे
मुख्यमंत्री देवेंद्र फडणवीस यांनी सोलापूर च्या विकासासाठी भरभरून दिले आहे. आता सोलापुरातील दोन्ही एमआयडीसीसाठी हा मोठा निधी उपलब्ध केला आहे. विशेष बाब म्हणून हा शासन आदेश काढला आहे.
या निधी मंजुरीमुळे सोलापूरच्या औद्योगिक क्षेत्राचा चेहरामोहरा बदलणार असून, उद्योगांना मोठा दिलासा मिळेल. आगामी काळात अधिक उद्योग आकर्षित करण्यासाठी ही पायाभूत सुविधा महत्त्वाची ठरेल, असा विश्वास आ. देवेंद्र कोठे यांनी व्यक्त केला. निधी मंजूर केल्याबद्दल आ. देवेंद्र कोठे यांनी मुख्यमंत्री देवेंद्र फडणवीस यांच्यासह संबंधित मंत्री आणि वरिष्ठ अधिकाऱ्यांचे आभार मानले.
उद्योग वाढीला चालना मिळेल : महापौर कोंड्याल
सोलापूर शहरातील एमआयडीसी मध्ये सुमारे 40 हजार कामगार काम करतात. 300 एकर क्षेत्रात ही एमआयडीसी वसली आहे. या ठिकाणी रस्त्यांसह विविध सोयी सुविधा कराव्यात अशी मागणी येथील उद्योजक, कामगार आणि नागरिकांची होती. आमदार देवेंद्र कोठे यांनी यशस्वी पाठपुरावा केला. आमदार कोठे हे जे बोलतात ते काम तडीस नेतातच. एका वर्षात त्यांनी एमआयडीसींसाठी भरघोस निधी आणला. त्यामुळे मुख्यमंत्री देवेंद्र फडणवीस यांनी हा निधी मंजूर केला. याबद्दल मुख्यमंत्री तसेच पालकमंत्री जयकुमार गोरे आणि आमदार कोठे यांचे महापौर विनायक कोंड्याल यांनी आभार मानले.
सोलापुरातील उद्योजकांना 14 कोटीचा दिलासा
या योजनेअंतर्गत 25 टक्के रक्कम एमआयडीसीतील उद्योजकांनी भरणे आवश्यक होते. उद्योजकांना ते अडचणीचे होते तसेच महापालिकेकडेही निधीची कमतरता असते. यामुळे मुख्यमंत्री देवेंद्र फडणवीस यांनी विशेष बाब म्हणून निर्णय घेत उद्योजकांना दिलासा दिला. 14 कोटीचा भुर्दड उद्योजकांना नको अशी सूचना केली.उद्योजकांवरील आर्थिक भार कमी करण्यासाठी आम्ही सातत्याने प्रयत्न केले. मुख्यमंत्री यांनी सकारात्मक निर्णय घेत १४ कोटी रुपयांची सूट दिली, ही सोलापूरसाठी मोठी बाब आहे असे आमदार कोठे यांनी सांगितले.
