वैराग – शेतात झोपलेल्या शेतकऱ्याला जीवे मारण्याची धमकी देऊन, लाथाबुक्यांनी मारहाण करत शेळ्या आणि रोख रक्कम लुटणाऱ्या सराईत गुन्हेगारांना जेरबंद करण्यात पांगरी पोलिसांना यश आले आहे. या कारवाईत पोलिसांनी चार आरोपींना अटक केली असून चोरीला गेलेला माल आणि गुन्ह्यात वापरलेली दुचाकी हस्तगत केली आहे.
रितेश पांडुरंग मोहीते (वय २१, रा. चिखर्डे, ता. बार्शी) हे दि. ३० मार्च २०२६ रोजी रात्री १०:३० च्या सुमारास आपल्या शेतातील पत्र्याच्या शेडमध्ये झोपण्यासाठी गेले होते. यावेळी एका मोटारसायकलवरून तीन अनोळखी इसम तेथे आले. त्यांनी शेडमध्ये घुसून दावणीला बांधलेल्या दोन शेळ्या आणि एक बोकड चोरण्याचा प्रयत्न केला.
रितेश यांनी या चोरीला विरोध केला असता, आरोपींनी त्यांना बेदम मारहाण केली. “गप्प बस, नाहीतर जीवे मारू” अशी धमकी देत आरोपींनी:
दोन शेळ्या (किंमत २०,००० रुपये)
एक बोकड (किंमत १५,००० रुपये)
रोख रक्कम (२,००० रुपये)
असा एकूण ३७,००० रुपयांचा ऐवज जबरदस्तीने लुटून नेला.
पोलिसांची वेगवान कारवाई आणि अटक
घटनेचे गांभीर्य ओळखून पांगरी पोलीस ठाण्याचे सहाय्यक पोलीस निरीक्षक साईनाथ सुरवसे यांनी तपासाची चक्रे फिरवली. तांत्रिक विश्लेषण आणि खबऱ्यांकडून मिळालेल्या माहितीच्या आधारे पोलिसांनी मळेगाव परिसरातील संशयितांना ताब्यात घेतले. सखोल चौकशीत त्यांनी गुन्ह्याची कबुली दिली.
अटक करण्यात आलेले आरोपी:
१. अजमेर ताजोद्धीन कोतवाल
२. सुरज नेताजी नागटिळक
३. बाळकृष्ण सुरेश फिस्के
४. बाबासाहेब सुरेश गायकवाड (सर्व राहणार मळेगाव)
जप्त केलेला मुद्देमाल
पोलिसांनी आरोपींकडून गुन्ह्यातील चोरीला गेलेल्या दोन्ही शेळ्या, बोकड आणि चोरीसाठी वापरलेली मोटारसायकल असा एकूण ८५,००० रुपये किमतीचा मुद्देमाल जप्त केला आहे.
तपास पथक
ही यशस्वी कामगिरी सोलापूर ग्रामीण पोलीस अधीक्षकांच्या मार्गदर्शनाखाली खालील पथकाने केली:
नेतृत्व: सहाय्यक पोलीस निरीक्षक साईनाथ सुरवसे.
सहभाग: पो. ह. सचिन माने, शबीर शेख, पो. कॉ. संगम वडले, रामा शिंदे, बळीराम बेदरे, चालक आशिष कुमार सानप.
तांत्रिक मदत: सायबर पोलीस ठाण्याचे कॉन्स्टेबल रतन जाधव.
शेतकऱ्यांवर होणाऱ्या अशा हल्ल्यांमुळे परिसरात भीतीचे वातावरण होते, मात्र पोलिसांनी अवघ्या काही दिवसांत आरोपींना बेड्या ठोकल्याने ग्रामस्थांनी समाधान व्यक्त केले आहे.
