सोलापूर : सोलापूर महापालिकेच्या सभागृहात नवीन वातानुकूलित (एसी) यंत्रणा कार्यान्वित करण्यात आली आहे. यामुळे रखरखत्या उन्हात आज सभागृह ठंडा.. ठंडा.. कुल.. कुल.. झाल्याचे अनुभवायला मिळाले. यामुळे सर्व सदस्यांमधून समाधान व्यक्त करण्यात आले.
सोलापूर महापालिकेत कै. यशवंतराव बळवंतराव चव्हाण सभागृहात सर्वसाधारण सभा होते. यंदाचा उन्हाळा अतिशय कडक आहे. यामुळे या सभागृहात मोठ्या प्रमाणात गरम वातावरण होते. दरम्यान, महापालिका सर्वसाधारण सभेमध्ये नगरसेवक अनंत जाधव यांनी सभागृहात वातानुकूलित यंत्रणा बसविण्याची सूचना केली होती. यासंदर्भात महापौर विनायक कोंड्याल यांनी तातडीने कार्यवाहीचे आदेश महापालिका आयुक्त डॉ. सचिन ओम्बासे यांना दिले होते. त्यानंतर महापालिकेच्या विद्युत विभागाकडून कार्यवाही करण्यात आली. विद्युत विभागाचे कार्यकारी अभियंता राजेश परदेशी आणि अभियंता महादेव इंगळे यांच्या मार्गदर्शनाखाली या सभागृहात नवीन वातानुकूलित (एसी) यंत्रणा बसविण्यात आली. आजच्या महापालिका सभेसाठी सभागृहात ही नवी वातानुकूलित यंत्रणा कार्यान्वित करण्यात आली. यामुळे सभागृहातील वातावरण थंडगार झाले होते. बाहेर उन्हाचा कडाका आणि सभागृहात वातानुकूलित यंत्रणामुळे थंडगार वातावरण असल्याने उपस्थित सर्व सदस्यांनी समाधान व्यक्त केले.
दरम्यान, सभागृहनेते नरेंद्र काळे यांनी या नव्या यंत्रणेची पाहणी केली. आवश्यक सूचना दिल्या. यावेळी नगरसेवक अनंत जाधव, व्यंकटेश कोंडी, अतिरिक्त आयुक्त संदीप कारंजे, विद्युत विभागाचे कार्यकारी अभियंता राजेश परदेशी, अभियंता महादेव इंगळे आदी उपस्थित होते.
21.5 लाख खर्चातून बसविले 14 एसी
सोलापूर महापालिकेच्या सभागृहात तीन टनाचे एकूण 12 टॉवर एसी (वातानुकूलित यंत्रणा) आणि दोन टन क्षमतेचे दोन स्प्लिट एसी असे एकूण 40 टन क्षमतेचे एकूण 14 एसी बसविण्यात आले आहेत. डायकिन कंपनीची ही वातानुकूलित यंत्रणा कार्यान्वित करण्यात आली आहे. यासाठी एकूण 21 लाख 50 हजार रुपये केबलसह खर्च झाला आहे.
सर्वांना थंड करण्यात भाजपा माहीर ..!
महापालिका सभागृहात वातानुकूलित यंत्रणा कार्यान्वित झाल्याने थंडगार वातावरण झाले होते. हे पाहून सर्वांना थंड करण्यात सत्ताधारी भाजपा माहीर असल्याची मिस्कील टिपणी काही सदस्यांनी केली. यावर उपस्थित सदस्यांमधून हास्याचे फवारे उडाले.
