सोलापूर : शहराच्या सांस्कृतिक ओळखीला नवे व्यासपीठ मिळावे, कलाकारांना स्वतंत्र दालन उपलब्ध व्हावे या उद्देशाने हाती घेण्यात आलेली महत्त्वाकांक्षी ‘शुभराय आर्ट गॅलरी’ योजना गेल्या तीन ते चार वर्षांपासून रखडल्याने नागरिकांमधून तीव्र नाराजी व्यक्त होत आहे. अर्धवट अवस्थेत पडून असलेल्या या प्रकल्पामुळे शहराच्या सौंदर्यावरही परिणाम होत असून, प्रशासनाच्या कार्यपद्धतीवर प्रश्नचिन्ह उपस्थित केले जात आहे.
दरम्यान, संबंधित बांधकाम हे भुईकोट किल्ल्याच्या ३०० मीटर परिसरात येत असल्याने पुरातत्व विभागाकडून नोटीस बजावण्यात आल्याची माहिती समोर येत आहे. या नोटीसमुळे पुढील काम थांबविण्यात आल्याचे सांगितले जात असले, तरी गेल्या अनेक महिन्यांपासून या अडचणीवर कोणताही ठोस तोडगा निघालेला नसल्याने प्रशासनाच्या भूमिकेवर प्रश्न उपस्थित केले जात आहेत.
सोलापूर महानगरपालिकेमार्फत राबविण्यात येणारा हा प्रकल्प सन २०२२-२३ मध्ये तत्कालीन आमदार प्रणिती शिंदे यांच्या आमदार निधीतून मंजूर करण्यात आला होता. यासाठी सुमारे २ कोटी ८७ लाख रुपयांचा निधी उपलब्ध करून देण्यात आला होता. शहरातील कला, चित्रकला, सांस्कृतिक कार्यक्रम व विविध प्रदर्शनांसाठी स्वतंत्र जागा निर्माण करण्याच्या उद्देशाने या प्रकल्पाची संकल्पना मांडण्यात आली होती.महापालिकेकडून हे काम शंभवी कन्स्ट्रक्शन या ठेकेदार संस्थेला देण्यात आले. सुरुवातीला बेसमेंटचे काम पूर्ण झाले असून गाळ्यांची उभारणी व इतर कामेही करण्यात आली आहेत. मात्र, मुख्य स्लॅबचे काम अद्यापही अपूर्ण असल्याने संपूर्ण प्रकल्प अर्धवट अवस्थेतच पडून आहे.
विशेष बाब म्हणजे, प्रकल्पाचे काम पूर्ण झाले नसतानाही संबंधित ठेकेदाराला दोन कोटी रुपयांहून अधिक रकमेचे बिल अदा करण्यात आल्याची माहिती समोर येत आहे. त्यामुळे “काम अपूर्ण आणि देयके पूर्ण” असा सवाल नागरिकांकडून उपस्थित केला जात आहे.
सध्या शुभराय आर्ट गॅलरी परिसरात अर्धवट सिमेंट-काँक्रीटचे ढांचे उभे असून, बंद अवस्थेतील बांधकामामुळे परिसराच्या विद्रूपीकरणात भर पडत आहे.
शहराच्या सांस्कृतिक विकासासाठी महत्त्वाचा मानला गेलेला हा प्रकल्प आता प्रशासनाच्या दुर्लक्षाचा बळी ठरत असल्याची भावना शहरवासीयांमधून व्यक्त होत आहे. त्यामुळे रखडलेल्या या प्रकल्पाबाबत प्रशासनाने तातडीने स्पष्ट भूमिका घेऊन काम पूर्ण करावे, अशी मागणी होत आहे.
