बार्शी – शिवसेना (उद्धव बाळासाहेब ठाकरे) पक्षाचे बार्शीचे आमदार दिलीप सोपल यांच्या आगळगांव रोडवरील निवासस्थानावर पेटते फटाके व स्फोटक स्वरुपाचे साहित्य फेकून आग लावण्याचा प्रयत्न केल्याप्रकरणी अटक करण्यात आलेल्या नागेश बाळू मोहिते व निखिल उर्फ अंबादास भारत रणझुंजारे या दोन आरोपींना बार्शी न्यायालयाने २९ जूनपर्यंत चार दिवसांची पोलीस कोठडी सुनावली आहे. या घटनेची जिल्हाभरात मोठी चर्चा सुरु असून वरिष्ठ पोलीस प्रशासनानेही या प्रकरणाची गंभीर दखल घेत तपासाला वेग दिला आहे.
या प्रकरणी आमदार सोपल यांचे बंधू सुधीर गंगाधर सोपल (वय ७८) यांनी बार्शी शहर पोलीस ठाण्यात फिर्याद दाखल केली होती. फिर्यादीनुसार, मंगळवार दि. २३ जून रोजी मध्यरात्री १.१५ वाजण्याच्या दरम्यान ते आपल्या निवासस्थानी झोपलेले असताना घराच्या पाठीमागील बी.टी.एम. पॅव्हेलियन मैदानाच्या दिशेने पेटत्या अवस्थेतील फटाके व स्फोटके घराच्या परिसरात येऊन पडू लागली. मोठ्या आवाजामुळे जाग आल्यावर त्यांनी खिडकीतून पाहिले असता परिसरातील काही झाडांना आग लागल्याचे निदर्शनास आले. त्यानंतर या घटनेबाबत पोलिसांत तक्रार दाखल करण्यात आली होती.
घटनेचे गांभीर्य लक्षात घेऊन वरिष्ठ पोलीस अधिकाऱ्यांनी तत्काळ दखल घेतली. सोलापूर येथील फॉरेन्सिक पथकाने घटनास्थळी भेट देऊन सुमारे दोन तास सखोल पाहणी व पुरावे संकलनाचे काम केले. तपासादरम्यान पोलिसांनी नागेश बाळू मोहिते व निखिल ऊर्फ अंबादास भारत रणझुंजारे (दोघेही रा. बार्शी) यांना ताब्यात घेत अटक केली.
गुरुवारी दि. २५ जून रोजी दोन्ही आरोपींना बार्शी येथील न्यायालयात न्यायाधीश पी. व्ही. राऊत यांच्यासमोर हजर करण्यात आले. तपास अधिकारी सहाय्यक पोलीस निरीक्षक बाळासाहेब जाधव व सरकारी पक्षाने आरोपींसोबत असलेल्या इतर संशयितांचा शोध, गुन्ह्यात वापरलेली वाहने, तसेच ही घटना कोणत्या उद्देशाने घडविण्यात आली याचा तपास करण्यासाठी सात दिवसांच्या पोलीस कोठडीची मागणी केली होती.
आरोपींच्या वतीने ॲड.महेश जगताप यांनी बचावत्मक बाजू मांडताना आरोपींची राजकीयदृष्ट्या गुन्ह्यात नावे घेतल्याचा युक्तिवाद केला.
दोन्ही बाजूंचा युक्तिवाद ऐकल्यानंतर न्यायालयाने आरोपींना २९ जूनपर्यंत चार दिवसांची पोलीस कोठडी सुनावली. यावेळी सरकारी वकील ॲड. राहुल काजळे, फिर्यादी पक्षाचे ॲड. विकास जाधव तसेच तपास अधिकारी एपीआय बाळासाहेब जाधव उपस्थित होते.
