सोलापूर – आषाढी वारीसाठी लाखो वारकरी पंढरपुराकडे मार्गस्थ होत असताना त्यांच्या आरोग्याची कोणतीही गैरसोय होऊ नये, यासाठी जिल्हा प्रशासन आणि आरोग्य विभागाने व्यापक तयारी सुरू केली आहे. वारी काळात आरोग्य सेवा अधिक प्रभावी, तत्पर आणि समन्वयपूर्ण राहावी या उद्देशाने शुक्रवारी पंढरपूर येथील आय.एम.ए. हॉलमध्ये नोडल अधिकाऱ्यांची महत्त्वपूर्ण आढावा बैठक पार पडली.
यावेळी जिल्हा शल्य चिकित्सक डॉ. वर्षा डोईफोडे, अतिरिक्त जिल्हा आरोग्य अधिकारी डॉ. नंदकिशोर घाडगे, सहाय्यक संचालक डॉ. मोहन शेगर, जिल्हा माता-बाल संगोपन अधिकारी डॉ. हर्षल जाधव, तालुका आरोग्य अधिकारी डॉ. एकनाथ बोधले यांच्यासह विविध विभागांचे वरिष्ठ अधिकारी उपस्थित होते.
या बैठकीत उपविभागीय अधिकारी तथा शिबीर नोडल अधिकारी सदाशिव पडदुणे यांनी वारीच्या पार्श्वभूमीवर सर्व विभागांनी परस्पर समन्वय राखून कार्य करण्याच्या सूचना देत, वारकऱ्यांना वेळेत आणि दर्जेदार आरोग्य सेवा उपलब्ध करून देण्यावर भर दिला. तसेच या बैठकीत आरोग्य सुविधांचे सूक्ष्म नियोजन करून प्रत्येक यंत्रणेला जबाबदाऱ्या स्पष्ट करण्यात आल्या.
पंढरपूर नगर परिषदेचे मुख्याधिकारी महेश रोकडे यांनी शहरातील स्वच्छता, पाणीपुरवठा आणि नागरी सुविधांबाबत करण्यात आलेल्या तयारीची माहिती दिली.वारीच्या काळात पालखी मार्गावरील आरोग्य केंद्रे, तात्पुरती वैद्यकीय पथके, रुग्णवाहिका सेवा, आवश्यक औषधसाठा, उष्माघात व संसर्गजन्य आजारांवरील प्रतिबंधात्मक उपाययोजना, पिण्याच्या पाण्याची गुणवत्ता आणि स्वच्छता व्यवस्थेचा सविस्तर आढावा बैठकीत घेण्यात आला. गर्दीच्या ठिकाणी त्वरित वैद्यकीय मदत उपलब्ध होण्यासाठी आवश्यक मनुष्यबळ आणि यंत्रणा सज्ज ठेवण्याचे निर्देशही देण्यात आले. याशिवाय, प्रत्येक विभागाने आपल्या कार्यक्षेत्रातील तयारीचा अहवाल सादर केला. संभाव्य आपत्कालीन परिस्थिती हाताळण्यासाठी समन्वय यंत्रणा अधिक सक्षम करण्यावरही बैठकीत भर देण्यात आला.
चौकट
समन्वयाच्या जोरावर वारी निर्विघ्न पार पाडण्याचा निर्धार
दरवर्षी लाखो भाविकांच्या उपस्थितीत होणाऱ्या आषाढी वारीत आरोग्य व्यवस्थेची भूमिका अत्यंत महत्त्वाची असते. यंदाही वारकऱ्यांना सुरक्षित, स्वच्छ आणि आरोग्यदायी वातावरण उपलब्ध करून देण्यासाठी प्रशासनाने पूर्वतयारीला गती दिली असून, विविध विभागांमधील समन्वयाच्या जोरावर वारी निर्विघ्न पार पाडण्याचा निर्धार या बैठकीतून देण्यात आला.
– सदाशिव पडदुने, उपविभागीय अधिकारी तथा शिबीर नोडल अधिकारी
