बार्शी – शहरातील बीआयटी कॉलेजसमोरील रस्त्यावर मंगळवारी (दि. २१ जुलै) सायंकाळी झालेल्या भीषण अपघातात शिक्षक राजेश मोहन सोनवणे (वय ५०) यांचा जागीच मृत्यू झाला, तर त्यांचा ११ वर्षीय मुलगा तेजस ऊर्फ स्वराज सोनवणे याचा उपचारादरम्यान मृत्यू झाला. या दुहेरी मृत्यूमुळे बार्शी शहरात हळहळ व्यक्त होत आहे.
पोलिसांनी दिलेल्या माहितीनुसार, सायंकाळी साडेसहा वाजण्याच्या सुमारास बीआयटी कॉलेजसमोरील रस्त्यावर एका अज्ञात चारचाकी वाहनाने दोनजणांना धडक दिल्याची माहिती निर्भया पथकाचे कर्मचारी बाबासाहेब घाडगे व डायल-११२ पथकाला मिळाली. त्यानंतर पोलिसांनी तातडीने घटनास्थळी धाव घेत जखमींना ग्रामीण रुग्णालयात दाखल केले. डॉक्टरांनी राजेश सोनवणे यांना तपासून मृत घोषित केले, तर गंभीर जखमी झालेल्या तेजस ऊर्फ स्वराज याला पुढील उपचारासाठी जगदाळे मामा रुग्णालयात हलविण्यात आले. मात्र, बुधवारी सकाळी उपचारादरम्यान त्याचाही मृत्यू झाला.
दरम्यान, पोलिसांनी घटनास्थळाचा पंचनामा करुन तपास सुरु केला असता अपघातस्थळापासून काही अंतरावर वाहनाची नंबर प्लेट आढळून आली. तसेच प्रत्यक्षदर्शी नागरिकांकडून मिळालेल्या माहितीनुसार अपघात करणारे वाहन मारुती सुझुकी डिझायर (क्र. MH-13 EX-2282) असल्याचे निष्पन्न झाले. तपासाअंती हे वाहन महेश नानासाहेब काजळे (रा. अरणगाव, ता. बार्शी) याच्या ताब्यात असल्याचे समोर आले. पोलिसांनी आरोपीसह अपघातग्रस्त वाहन येरमाळा परिसरातून ताब्यात घेतले आहे.
मयत राजेश सोनवणे यांचा मोठा मुलगा सक्षम सोनवणे (वय १९) याने दिलेल्या फिर्यादीनुसार, त्यांचे वडील व लहान भाऊ रस्त्याच्या कडेला पायी घरी जात असताना भरधाव व निष्काळजीपणे चालविण्यात आलेल्या डिझायर कारने पाठीमागून जोरदार धडक दिली. अपघातानंतर चालकाने वाहन न थांबवता घटनास्थळावरुन पलायन केल्याचा आरोप फिर्यादीत करण्यात आला आहे.
या प्रकरणी बार्शी शहर पोलीस ठाण्यात आरोपी महेश नानासाहेब काजळे याच्याविरुद्ध भारतीय न्याय संहिता (BNS) कलम 281, 106(1), 125(B) तसेच मोटार वाहन कायदा कलम 184 आणि 134 (अ), (ब) अन्वये गुन्हा दाखल करण्यात आला असून पुढील तपास बार्शी शहर पोलीस करीत आहेत.
