सोलापूर – श्राविका संस्था संचलित, पी. एस्. इंग्लिश मिडीयम प्री-प्रायमरी, प्रायमरी व हायस्कूल विभागाच्या वतीने आषाढी एकादशीचे औचित्य साधून संयुक्तपणे पालखी पुजन व दिंडी सोहळ्याचे दिमाखदार स्वरुपात आयोजन करण्यात आले होते.
या भक्तीमय सोहळ्याच्या आरंभी प्रसन्न अश्या वातावरणात शाळेच्या जवळपासच्या परिसरातून दिंडी काढण्यात आली. यामध्ये विठ्ठल-रुक्मिणी, विविध संत, वारकरी इ. वेशभूषेत शाळेतील विद्यार्थी व विद्यार्थिनी अत्यंत उत्साहाने नटून थटून सहभागी झाले होते.विठ्ठलाच्या नामघोषात, टाळ मॄदुंगाच्या गजरात व शाळेच्या बॅंडपथकासहीत संपन्न झालेल्या या दिंडी सोहळ्यानंतर चैतन्यमय वातावरणात हायस्कूलच्या मुख्याध्यापिका कांबळे मॅडम , पर्यवेक्षक शिरढोणे सर प्रायमरीच्या पर्यवेक्षिका रामावत मॅडम व प्री-प्रायमरीच्या समन्वयक अक्कलकोटे मॅडम यांच्या हस्ते विठ्ठल-रुक्मिणीच्या पालखीचे रितसर पुजन करण्यात आले. याप्रसंगी विठ्ठल नामघोषाने विद्यार्थ्यांनी शाळेचा परिसर भारावून टाकला; हायस्कूलची विद्यार्थिनी राधिका माने हिने आषाढी एकादशीचे महत्त्व या विषयावर भाषण केले.या भाषणानंतर प्रायमरी व हायस्कूलच्या विद्यार्थ्यांनी विठ्ठलाच्या भक्ती गीतावर आधारित नॄत्यकला सादर करुन सर्वांना मंत्रमुग्ध केले. यानंतर शिस्तबद्ध रित्या शाळेच्या आवारात रिंगण सोहळा पार पडला. शेवटी पसायदान म्हणून व विद्यार्थ्यांना प्रसाद वाटप करुन या सोहळ्याची सांगता करण्यात आली.
अतिशय उत्साही व भक्तीमय वातावरणात पार पडलेल्या या रंगा रंग सोहळ्याचे सुत्रसंचालन हायस्कूलच्या सह शिक्षिका नवल पाटील यांनी केले; तर हा कार्यक्रम सादर करण्यासाठी शाळेतील सर्व शिक्षक व कर्मचारी यांनी परिश्रम घेतले.
