बार्शी – लायन्स क्लब बार्शी टाऊनच्यावतीने आयोजित करण्यात आलेल्या पीस पोस्टर स्पर्धा – २०२६ या उपक्रमाला बार्शी परिसरातील शाळा आणि विद्यार्थ्यांकडून उत्स्फूर्त प्रतिसाद मिळाला असून, आतापर्यंत ६ शाळांमधील तब्बल ३१४ विद्यार्थ्यांनी या स्पर्धेत सहभाग नोंदवला आहे. विद्यार्थ्यांच्या कलागुणांना प्रोत्साहन देतानाच शांतता, प्रेम, सहिष्णुता, बंधुभाव आणि मानवतेचा संदेश समाजापर्यंत पोहोचवणारा हा उपक्रम ठरत आहे.
यावर्षीचे PMJF डिस्ट्रिक्ट गव्हर्नर श्री. राजेंद्र शहा कासवा यांच्या सूचनेनुसार आणि पीस पोस्टर कॅबिनेट ऑफिसर श्री. सुहासजी निकम यांच्या मार्गदर्शनाखाली ही स्पर्धा आयोजित करण्यात आली आहे.
या स्पर्धेत पुढील शाळांमधील विद्यार्थ्यांनी सहभाग नोंदवला आहे.१. सिल्व्हर ज्युबिली हायस्कूल, बार्शी २. सुयश विद्यालय, बार्शी ३. सेंट जोसेफ स्कूल, बार्शी ४. आनंदराव पाटील विद्यालय, मालवंडी ५. श्री शिपलागिरीजी महाराज प्राथमिक आश्रमशाळा, देगाव (वा.), ता. मोहोळ
६. लोकसेवा विद्यालय, आगळगाव
३१४ विद्यार्थ्यांचा सहभाग ही केवळ आकडेवारी नसून, शांतता आणि मानवतेच्या विचारांशी जोडली गेलेली सर्जनशील मने आहेत. विद्यार्थ्यांनी आपल्या कल्पकतेतून आणि चित्रकलेच्या माध्यमातून विश्वशांतीचा संदेश प्रभावीपणे मांडण्याची संधी या स्पर्धेमुळे उपलब्ध झाली आहे.
जगभरात शांतता, सौहार्द आणि बंधुभावाचे महत्त्व अधोरेखित करण्यासाठी लायन्स इंटरनॅशनलच्या वतीने पीस पोस्टर स्पर्धेचे आयोजन केले जाते. या संकल्पनेला अनुसरुन लायन्स क्लब बार्शी टाऊनने हा उपक्रम राबवला आहे.
विद्यार्थ्यांच्या कलागुणांना वाव देणे, त्यांच्या सर्जनशीलतेला चालना देणे आणि चित्रांच्या माध्यमातून शांततेचा विचार नव्या पिढीपर्यंत पोहोचवणे, हा या स्पर्धेचा प्रमुख उद्देश आहे.
आजच्या विद्यार्थ्यांच्या मनात शांतता, प्रेम, सहिष्णुता आणि परस्पर आदराची भावना रुजली, तर उद्याचे जग अधिक सुरक्षित, सुंदर आणि आनंदी होऊ शकते. याच विचारातून क्लबने हा उपक्रम हाती घेतला आहे.
या उपक्रमाच्या यशस्वी आयोजनासाठी क्लबचे अध्यक्ष ला. आदित्य कोठारी, सचिव द्वारकेश डोईफोडे, सहसचिव प्रेमजी भानुशाली, खजिनदार शिशिर मते आणि प्रकल्प समन्वयक अमित कटारिया प्रयत्नशील आहेत.
यावेळी क्लबचे अध्यक्ष लायन आदित्य कोठारी यांनी सांगितले की, ३१४ विद्यार्थ्यांचा सहभाग आणि सहा शाळांचा उत्स्फूर्त प्रतिसाद ही आमच्यासाठी अभिमानाची आणि प्रेरणेची बाब आहे. विद्यार्थ्यांच्या मनात शांतता, प्रेम, बंधुभाव आणि मानवतेची मूल्ये रुजवणे ही काळाची गरज आहे. चित्रकलेसारख्या सर्जनशील माध्यमातून विश्वशांतीचा संदेश नव्या पिढीपर्यंत पोहोचवण्याचा आमचा प्रयत्न आहे. या उपक्रमाला सहकार्य करणाऱ्या सर्व शाळांचे मुख्याध्यापक, शिक्षक आणि विद्यार्थ्यांचे आम्ही मनःपूर्वक आभारी आहोत. भविष्यातही समाजोपयोगी उपक्रमांच्या माध्यमातून सामाजिक जाणीव आणि सकारात्मक विचार रुजवण्यासाठी लायन्स क्लब बार्शी टाऊन कटिबद्ध राहील.
