सोलापूर – कुर्डू (ता. माढा) येथील प्राथमिक शाळा व क्रीडा संकुलासाठी गट क्रमांक १७६ मधील एक हेक्टर जमीन उपलब्ध करून देण्याच्या प्रस्तावाला जिल्हाधिकाऱ्यांच्या आदेशानंतरही अपेक्षित गती मिळत नसल्याचा आरोप जिल्हा परिषद सदस्य आण्णासाहेब उर्फ संभाजी धोंडीबा ढोणे यांनी केला आहे. जमीन उपलब्ध होण्याचा मार्ग मोकळा होण्याऐवजी प्रशासकीय कागदपत्रे आणि विविध विभागांच्या अभिप्रायांच्या माध्यमातून अडथळे वाढत असल्याचे त्यांनी म्हटले आहे.
कुर्डू गावातील विद्यार्थ्यांसाठी प्राथमिक शाळा आणि क्रीडा संकुल उभारण्यासाठी गट क्रमांक १७६ मधील एक हेक्टर जमीन उपलब्ध करून देण्याची मागणी ढोणे यांनी केली होती. त्यानंतर महसूल विभागाच्या निर्देशानुसार माढा तहसीलदारांनी संबंधित विभागांना पत्र पाठवून जमीन मागणीचा परिपूर्ण प्रस्ताव सादर करण्याचे आदेश दिले आहेत.
या आदेशात भूमिअभिलेख विभागाचा मोजणी नकाशा, वन विभागाचा अहवाल, प्रशासकीय मान्यता व निधीचा तपशील, नगररचना विभागाचा अभिप्राय, ग्रामपंचायत व ग्रामसभेचे ठराव, ५० वर्षांचे सातबारा उतारे, जमिनीच्या सद्यस्थितीचा पंचनामा, जमिनीचे मूल्यांकन तसेच पाटबंधारे, सार्वजनिक बांधकाम, महावितरण व आरोग्य विभागांचे अभिप्राय सादर करण्याचे निर्देश देण्यात आले आहेत.
मात्र जिल्हाधिकाऱ्यांच्या आदेशानंतर तहसीलदारांनी गटशिक्षणाधिकाऱ्यांना पुढील कार्यवाहीचे निर्देश देऊनही प्रत्यक्षात जमीन उपलब्ध करून देण्याची प्रक्रिया सुलभ होण्याऐवजी आणखी कागदपत्रे आणि अहवालांच्या प्रक्रियेत अडकत चालली आहे, अशी नाराजी ढोणे यांनी व्यक्त केली.
‘जिल्हाधिकाऱ्यांच्या आदेशानंतर संबंधित विभागांनी समन्वयाने कार्यवाही करून विद्यार्थ्यांसाठी शाळा व क्रीडा संकुलाचा प्रश्न मार्गी लावणे अपेक्षित होते. मात्र त्याऐवजी पुन्हा विविध विभागांचे अभिप्राय, अहवाल आणि कागदपत्रे मागविली जात आहेत. त्यामुळे प्रस्तावाचा मार्ग मोकळा होण्याऐवजी अडथळे वाढत आहेत,’ असा आरोप ढोणे यांनी केला.
दरम्यान, तहसीलदारांनी संबंधित सर्व विभागांचे अभिप्राय घेऊन परिपूर्ण प्रस्ताव गटविकास अधिकारी यांच्या माध्यमातून गटशिक्षणाधिकाऱ्यांनी तहसील कार्यालयाकडे सादर करण्याचे निर्देश दिले आहेत. त्यामुळे आता संबंधित विभागांकडून अहवाल प्राप्त होऊन प्रस्ताव प्रत्यक्षात किती वेगाने पुढे सरकतो, याकडे कुर्डू ग्रामस्थ आणि पालकांचे लक्ष लागले आहे.
