पंढरपूर – पुणे विभागीय शिक्षक व पदवीधर मतदारसंघाच्या निवडणुकीचे वातावरण आता चांगलेच तापू लागले आहे. भाजपने शिक्षक मतदारसंघासाठी कौस्तुभ गावडे, तर पदवीधर मतदारसंघासाठी स्मिता योगेश जाधव यांच्या उमेदवारीची घोषणा केल्यानंतर इच्छुक आणि बंडखोर उमेदवारांकडून अर्ज दाखल करण्याची लगबग सुरू झाली आहे. अर्ज भरण्याची अंतिम मुदत मंगळवारी ६ ऑक्टोबर असून, त्यामुळे राजकीय हालचालींना वेग आला आहे.
पंढरपूर येथील विठ्ठल अभियांत्रिकी महाविद्यालयाचे संस्थापक-सचिव डॉ. बी. पी. रोंगे हे शिक्षक मतदारसंघातून आपला उमेदवारी अर्ज दाखल करणार आहेत. अर्ज भरण्यासाठी पुण्याकडे रवाना होण्यापूर्वी त्यांनी सोमवारी (ता.५) सकाळी श्री संत नामदेव पायरीचे दर्शन घेतले आणि उमेदवारी अर्ज दाखल करण्यासाठी ते पुण्याकडे रवाना झाले.
———————–
चौकट : ( आता माघार नाही, विजय मिळवून गुलाल उधळूनच परतायचे
: डॉ.रोंगे )
डॉ. बी. पी. रोंगे यांनी आपली भूमिका स्पष्ट करताना सांगितले की, “आता माघार नाही; विजय मिळवून गुलाल उधळूनच परतायचे,” असा निर्धार देखील यावेळी त्यांनी व्यक्त केला. कारण गेल्या दोन वर्षांपासून शिक्षकांचे विविध प्रश्न सोडवण्यासाठी आपण सातत्याने प्रयत्न करत असून, गेल्या दहा वर्षांपासून भाजपच्या माध्यमातून सामाजिक व राजकीय काम करत असल्याचे त्यांनी सांगितले. शिक्षकांच्या पेन्शनचा प्रश्न, शिक्षकांना भेडसावणाऱ्या विविध अडचणी तसेच त्यांच्या प्रलंबित मागण्या शासन दरबारी मांडण्यासाठी आपण सातत्याने प्रयत्न केले आहेत. शिक्षकांच्या प्रश्नांसाठी गेल्या दोन वर्षांत स्वतंत्र चळवळ उभी केली असून, हे प्रश्न मार्गी लागावेत यासाठी शासनस्तरावर पाठपुरावा केला असल्याचे डॉ. रोंगे यांनी सांगितले.
——————-
चौकट : (बहुरंगी लढत होण्याची चिन्हे )
दरम्यान, भाजपने कौस्तुभ गावडे यांना उमेदवारी दिल्याने शिक्षक मतदारसंघात पक्षांतर्गत नाराजीचे पडसाद उमटण्याची शक्यता आहे. शिवसेनेच्या वैद्यकीय कक्षाचे प्रमुख मंगेश चिवटे हेही मंगळवारी (ता.६) अपक्ष म्हणून अर्ज दाखल करणार असल्याची माहिती आहे. त्यामुळे शिक्षक मतदारसंघात भाजपचे अधिकृत उमेदवार कौस्तुभ गावडे, कृती समितीच्या माध्यमातून माजी आमदार दत्तात्रय सावंत,डॉ.बी.पी.रोंगे आणि मंगेश चिवटे यांच्यासह अन्य उमेदवारांमुळे बहुरंगी लढत होण्याची शक्यता निर्माण झाली आहे.
——————–
चौकट : (उमेदवारी अर्ज भरण्याचा मंगळवारी अंतिम दिवस)
पुणे विभागातील शिक्षक आणि पदवीधर मतदारसंघाच्या निवडणुकीत आता अंतिम टप्प्यात मोठी राजकीय चुरस पाहायला मिळणार आहे. मंगळवारी ६ ऑक्टोबर हा अर्ज दाखल करण्याचा अंतिम दिवस असल्याने अखेरच्या दिवशी कोणकोणते उमेदवार मैदानात उतरतात, याकडे सर्वांचे लक्ष लागले आहे.
——————–
चौकट : ( उमेदवाराच्या अंतिम यादी नंतर होणार चित्र स्पष्ट )
पुणे विभागात सुमारे २ लाख ७ हजार पदवीधर मतदार, तर सुमारे ५१ हजार शिक्षक मतदार मतदानाचा हक्क बजावणार असल्याने या निवडणुकीला विशेष महत्त्व प्राप्त झाले आहे. उमेदवारांची अंतिम यादी स्पष्ट झाल्यानंतर शिक्षक आणि पदवीधर मतदारसंघातील निवडणुकीचे खरे चित्र समोर येणार आहे.
—————–
