बार्शी – महाराष्ट्र शासनाच्या ‘महाराष्ट्र महिला सक्षमीकरण अधिनियम २०२६’ अंतर्गत राबविण्यात येत असलेल्या महिला शेतकरी प्रमाणपत्र वितरण मोहिमेत बार्शी तालुक्याने ऐतिहासिक कामगिरी नोंदवली आहे. आतापर्यंत तालुक्यातील तब्बल ३४ हजार २३५ महिलांना प्रमाणपत्रांचे वितरण करण्यात आले असून, या उल्लेखनीय कामगिरीच्या जोरावर बार्शी तालुक्याने पुणे विभागात प्रथम क्रमांक पटकावला आहे. तालुका कृषी अधिकारी संतोष कोयले यांनी ही माहिती दिली.
महाकृषी विभागाच्या अधिकृत आकडेवारीनुसार, महिला शेतकरी प्रमाणपत्र वितरणामध्ये बार्शी तालुक्याने सोलापूर जिल्ह्यासह पुणे विभागात आघाडी घेतली आहे. जिल्ह्यात बार्शीनंतर माळशिरस तालुक्याचा ३३ हजार ९०४ आणि दक्षिण सोलापूर तालुक्याचा ३० हजार ७६ नोंदणीसह क्रमांक लागतो. बार्शी तालुक्यातील गावनिहाय आकडेवारी पाहता बार्शी शहर व परिसरात १ हजार ५४६, वैरागमध्ये १ हजार २३०, उपळाई (ठोंगे) येथे ९७४, उपळे (दुमाला) येथे ८९२, पानगाव येथे ८५७, पांगरी येथे ७७५, खांडवी येथे ७६०, तर नारी येथे ७२६ महिलांची नोंदणी झाली आहे.
या प्रमाणपत्रासाठी १८ वर्षांवरील आणि शेती किंवा शेतीशी संबंधित व्यवसाय करणाऱ्या महिला पात्र आहेत. विशेष म्हणजे, महिलेच्या स्वतःच्या नावावर शेतजमीन असणे बंधनकारक नाही. शेतीसोबतच कुक्कुटपालन, पशुपालन, दुग्धव्यवसाय आणि मत्स्यव्यवसाय यासारखे पूरक व्यवसाय करणाऱ्या महिलांनाही या प्रमाणपत्राचा लाभ घेता येणार आहे. महिला शेतकऱ्यांना नोंदणीसाठी कार्यालयांचे उंबरठे झिजवण्याची गरज नसून, स्वतःच्या मोबाईलवरुन ओटीपीद्वारे घरबसल्या अर्ज करता येतो. तसेच गावातील सहाय्यक कृषी अधिकाऱ्यांच्या माध्यमातूनही नोंदणीची सुविधा उपलब्ध आहे. प्राप्त अर्जांना ग्रामसभेत रीतसर मंजुरी दिल्यानंतर प्रमाणपत्रांचे वितरण करण्यात येते.
पुणे विभागात प्रथम क्रमांक मिळविल्यानंतरही कृषी विभागाने समाधान न मानता आगामी दोन महिन्यांत बार्शी तालुक्यातील सर्व पात्र महिलांची शंभर टक्के नोंदणी पूर्ण करण्याचे उद्दिष्ट निश्चित केले आहे. अद्याप ज्या पात्र महिला प्रमाणपत्रापासून वंचित आहेत, त्यांनी आपल्या गावातील सहाय्यक कृषी अधिकाऱ्यांशी संपर्क साधून तातडीने नोंदणी करुन घ्यावी, असे आवाहन तालुका कृषी अधिकारी संतोष कोयले यांनी केले आहे.
महिला शेतकऱ्यांना अधिकृत ओळख मिळवून देण्यासोबतच शेती आणि पूरक व्यवसायांमध्ये महिलांचा सहभाग अधोरेखित करणारी ही मोहीम बार्शी तालुक्यासाठी महत्त्वपूर्ण ठरत आहे.
