जालना – जालना शहरातील मंगळ बाजार व लगतच्या परिसरातील
नागरिकांना दर्जेदार आणि परवडणार्या आरोग्य सुविधा उपलब्ध करून
देण्यासाठी या भागात ३० खाटांच्या क्षमतेचे नागरी सामुदायिक आरोग्य
केंद्र (अर्बन कम्युनिटी हेल्थ सेंटर) स्थापन करण्यात यावे, अशी मागणी
नगरसेवक दुर्गेश किशनलाल काठोठीवाले यांनी केली आहे. यासंदर्भात त्यांनी
जालना शहर महानगरपालिकेच्या आयुक्तांना लेखी निवेदन देऊन सदर प्रस्ताव
आगामी सर्वसाधारण सभेच्या विषयपत्रिकेत समाविष्ट करून मंजुरी देण्याची
मागणी केली आहे.
मंगळ बाजार आणि परिसरातील वाढती लोकसंख्या, नागरिकांच्या आरोग्यविषयक
गरजा तसेच सध्या उपलब्ध असलेल्या आरोग्य सुविधांवरील वाढता ताण लक्षात
घेता या ठिकाणी स्वतंत्र आरोग्य केंद्राची आवश्यकता असल्याचे निवेदनात
नमूद करण्यात आले आहे. विशेषतः आर्थिकदृष्ट्या दुर्बल घटक, ज्येष्ठ
नागरिक, महिला आणि बालकांना वेळेवर वैद्यकीय उपचार मिळावेत, हा या
मागणीमागील प्रमुख उद्देश आहे.
प्रस्तावित ३० खाटांच्या आरोग्य केंद्रात बाह्यरुग्ण विभाग (ओपीडी),
आंतररुग्ण विभाग (आयपीडी), प्राथमिक व नियमित उपचार, आपत्कालीन
आरोग्यसेवा, माता-बाल आरोग्य सेवा, वैद्यकीय तपासण्या, औषधोपचार आणि
प्रयोगशाळा सुविधा उपलब्ध करून देण्याची मागणी करण्यात आली आहे. यामुळे
परिसरातील नागरिकांना किरकोळ तसेच आवश्यक वैद्यकीय उपचारांसाठी दूरवर
जाण्याची गरज भासणार नाही. परिणामी नागरिकांचा वेळ आणि आर्थिक खर्च
वाचण्यास मदत होईल.
या आरोग्य केंद्रासाठी योग्य जागा निश्चित करून नवीन इमारत उभारणे अथवा
महानगरपालिकेच्या उपलब्ध इमारतीचा विकास करून तिचा वापर करणे, आवश्यक
वैद्यकीय अधिकारी, तज्ज्ञ डॉक्टर, परिचारिका व आरोग्य कर्मचार्यांची
नियुक्ती करणे, ३० खाटा, वैद्यकीय उपकरणे आणि औषधसाठा उपलब्ध करून देणे,
तसेच वार्षिक देखभाल व व्यवस्थापनासाठी निधीची तरतूद करण्याची मागणीही
करण्यात आली आहे.
प्रकल्पासाठी तांत्रिक अंदाजपत्रक तयार करून प्रशासकीय व आर्थिक मंजुरी
देण्याची कार्यवाही करण्यात यावी, अशी मागणी नगरसेवक काठोठीवाले यांनी
केली आहे. मंगळ बाजार परिसरातील हजारो नागरिकांच्या आरोग्याच्या दृष्टीने
हा प्रकल्प महत्त्वपूर्ण ठरणार असून, सार्वजनिक आरोग्य व्यवस्था अधिक
सक्षम करण्यासाठी महानगरपालिकेने या प्रस्तावाला प्राधान्य द्यावे, अशी
अपेक्षा त्यांनी व्यक्त केली आहे.
आगामी सर्वसाधारण सभेत या प्रस्तावावर सविस्तर चर्चा करून आवश्यक ठराव
पारित करावा आणि आरोग्य केंद्राच्या प्रत्यक्ष उभारणीसाठी पुढील
कार्यवाही तातडीने सुरू करावी, असेही निवेदनात म्हटले आहे.


















