ठाकरे गटातून शिंदे गटात इनकमिंग सुरूच आहे. आता नाशिकमध्ये शिंदे गटाने शिवसेना उद्धव बाळासाहेब ठाकरे गटाला मोठा धक्का दिला आहे. ठाकरे गटातील 12 माजी नगरसेवक शिंदे गटाच्या गळाला लागले आहेत. ठाकरे गटातील 12 माजी नगरसेवकांनी शिंदे गटात प्रवेश केला आहे. या माजी नगरसेवकांनी मुख्यमंत्री एकनाथ शिंदे यांच्या उपस्थितीत मुंबईमध्ये शिंदे गटात प्रवेश केला आहे. आगामी महापालिका निवडणुकीच्या तोंडावर हा ठाकरे गटासाठी मोठा धक्का मानण्यात येत आहे. ठाकरे गटाने मुंबईसह नाशिक महापालिकेच्या निवडणुकीची तयारी सुरू केली आहे. याच पार्श्वभूमीवर काही दिवसांपूर्वी ठाकरे गटाचे नेते खासदार संजय राऊत यांचा नाशिक दौरा देखील झाला होता. मात्र आता नाशिकच्या ठाकरे गटाच्या माजी नगरसेवकांनी शिंदे गटात प्रवेश केला आहे.
माजी नगरसेवक अजय बोरस्ते, सूर्यकांत लवटे, रमेश धोंगडे, डी. जी. सुर्यवंशी, सुदाम ढेमसे, श्यामकुमार साबळे, चंद्रकांत खाडे, सुवर्णा मटाले, पुनम मोगरे, जयश्री खर्जुळ, ज्योती खोले यांच्यासह अन्य माजी नगरसेवकांनी शिंदे गटात प्रवेश केल्याची माहिती समोर येत आहे. त्यांनी मुख्यमंत्री एकनाथ शिंदे यांच्या उपस्थितीमध्ये शिंदे गटात प्रवेश केला. यावेळी मंत्री दादा भुसे, खा. हेमंत गोडसे यांच्यासह शिंदे गटाचे पदाधिकारी उपस्थितीत होते.
येत्या काळात मुंबईसह प्रमुख महापालिकांच्या निवडणुका होणार आहेत. यामध्ये नाशिक महापालिकेचा देखील समावेश आहे. ठाकरे गटाने या निवडणुकीसाठी मोर्चेबांधणीला सुरुवात देखील केली आहे. मात्र आता नाशिकमधील ठाकरे गटाच्या बारा नगरसेवकांनी शिंदे गटात प्रवेश केल्यानं हा ठाकरे गटासाठी मोठा धक्का माणण्यात येत आहे.
