मंगळवेढा – मंगळवेढा पोलीस ठाण्यात महिला व बाल विकास विभागाकडून सुरू असलेल्या महिला समुपदेशन केंद्राने यंदा उल्लेखनीय कामगिरी केली आहे. चालू वर्षी प्राप्त झालेल्या ३०० कौटुंबिक तक्रारींपैकी तब्बल २५० तुटलेल्या संसारांचा समझोता घडवून पुन्हा नव्याने संसाराचा गाडा उभा करण्यात केंद्राला यश आले आहे.
पोलीस निरीक्षक दत्तात्रय बोरिगिड्डे यांच्या मार्गदर्शनाखाली येथील दोन महिला अधिकाऱ्यांनी पती-पत्नींना प्रत्यक्ष बोलावून भांडणाच्या मूळाशी जाऊन संसार तुटण्याचे नेमके कारण शोधून त्यांच्या मनाचे परिवर्तन घडवले. त्यामुळे विस्कटलेली कुटुंबे पुन्हा एकत्र आली असून सध्या ही जोडपी सुखाने आणि आनंदी वातावरणात संसार करीत आहेत.
*मोबाईल ठरतोय संसार मोडण्याचे कारण*
सध्याचा जमाना व्हॉट्सॲप, फेसबुक, इन्स्टाग्रामचा असल्याने प्रत्येकाच्या हातात मोबाईल आहे. अनेक तक्रारींवरून असे निदर्शनास आले की, पत्नी मोबाईलवरून वारंवार कोणाबरोबर बोलते, या संशयावरून अनेकांचे संसार मोडले आहेत. मोबाईल हा अनेकांचे संसार मोडण्यास कारणीभूत होत असल्याचे समुपदेशनातून समोर आले आहे.
याशिवाय विवाहबाह्य संबंध, पहिला विवाह लपवून दुसरा विवाह करून फसवणूक करणे, घराकडे पुरुषांचे दुर्लक्ष, आर्थिक अस्थिरता, दारूचे व्यसन आदी कारणांमुळेही अनेक तक्रारी समुपदेशन केंद्राकडे आल्या होत्या.
संसार हा आयुष्यातला महत्त्वाचा टप्पा असून पती-पत्नीने एकमेकांकडे संशयाने न पाहता मोठ्या मनाने संसार कसा टिकेल याचा विचार करावा, असे आवाहन समुपदेशन केंद्राकडून करण्यात आले आहे.
*फोटो ओळ -* मंगळवेढा पोलीस ठाण्यात तक्रार निवारणासाठी असलेले महिला समुपदेशन केंद्र.
