सोलापूर – गंभीर स्वरूपाचे गुन्हे दाखल असलेला सराईत गुन्हेगार, अॅलन सॅमसन काळे, (वय-३५ वर्षे, रा. हॉटलॅन्ड कम्पाऊंडजवळ, रंगभवन चर्च, सोलापूर) यास सोलापूर शहर व उर्वरित सोलापूर जिल्ह्यातून एक वर्षाकरिता तडीपार करण्यात आले आहे.
त्याच्याविरुद्ध सन २०१८,२०१९ व २०२६ या कालावधीमध्ये घातक शस्त्रे जवळ बाळगून दहशत निर्माण करणे, खंडणी मागणे, महिला अत्याचाराचे गुन्हे करणे यासारखे गुन्हे दाखल असल्याने त्याचेविरुध्द सदर बझार पोलीस ठाणेकडून महाराष्ट्र पोलीस अधिनियम १९५१ कलम ५६ (१) (अ) (ब) अन्वयेचा तडीपार प्रस्ताव पोलीस उप-आयुक्त (परिमंडळ), सोलापूर शहर यांना सादर करण्यात आला होता. सदर प्रस्तावाचे अनुषंगाने पोलीस उप-आयुक्त (परिमंडळ)प्रितम यावलकर यांनी कार्यवाही करुन त्याला सोलापूर शहर व उर्वरीत सोलापूर जिल्हा येथून एक वर्षाकरीता तडीपार केले आहे.
