सोलापूर : सोलापुरातील चिंचोळी एमआयडीसी येथे बालाजी अमाईन्स कंपनीने देशातील पहिला डायमिथाईल इथर (DME) उत्पादन प्रकल्प यशस्वीरित्या कार्यान्वित केला असून २० मे पासून व्यावसायिक उत्पादनास सुरुवात करण्यात आली आहे, अशी माहिती कंपनीचे व्यवस्थापकीय संचालक डी. राम रेड्डी यांनी पत्रकार परिषदेत दिली.
डीएमईचे व्यावसायिक स्तरावर उत्पादन करणारी बालाजी अमाईन्स ही भारतातील एकमेव कंपनी ठरली आहे. डीएमई हे एलपीजीमध्ये मिश्रण करून वापरता येणारे स्वच्छ आणि कार्यक्षम पर्यायी इंधन मानले जाते. युरोप आणि पाश्चिमात्य देशांमध्ये एलपीजीमध्ये २० टक्क्यांपर्यंत डीएमईचे मिश्रण करून वापर केले जात असल्याचे कंपनीने स्पष्ट केले.कंपनीने अत्याधुनिक तंत्रज्ञानाच्या आधारे वार्षिक १ लाख मेट्रिक टन उत्पादन क्षमतेचा हा प्रकल्प उभारला असून डीएमई उत्पादनासाठी आवश्यक मूलभूत अभियांत्रिकी तंत्रज्ञान परदेशी कंपनीकडून प्राप्त करण्यात आले आहे.
व्यवस्थापकीय संचालक डी. राम रेड्डी यांनी सांगितले की, हा प्रकल्प भारताच्या ऊर्जा आत्मनिर्भरतेच्या दिशेने महत्त्वाचे पाऊल आहे. भारतात डीएमई उत्पादन पूर्णपणे नवीन असल्याने बीआयएसने नुकताच नवीन आयएस कोड जाहीर केला असून त्यानुसार एलपीजीमध्ये ८ टक्क्यांपर्यंत डीएमई मिश्रणास मान्यता देण्यात आली आहे. सार्वजनिक क्षेत्रातील ऑइल मार्केटिंग कंपन्यांनी आता डीएमई मिश्रण प्रकल्पांसाठी पुढाकार घ्यावा, असे आवाहनही त्यांनी केले.
जागतिक ऊर्जा क्षेत्रातील वाढती अनिश्चितता लक्षात घेता पर्यायी इंधनांचा विकास अत्यावश्यक बनला असून डीएमईच्या वापरामुळे भारताचे एलपीजी आयातीवरील अवलंबित्व कमी होऊन परकीय चलनाची बचत होण्यास मदत होणार असल्याचे त्यांनी नमूद केले.
भारतामधील हा पहिलाच डीएमई उत्पादन प्रकल्प असल्याने उत्पादन साठवण, वाहतूक, हाताळणी आणि रोड टँकर परिवहन यांसाठी आवश्यक भारतीय मानकांचा अभाव असल्यामुळे PESO परवानग्या आणि इतर वैधानिक मंजुरी मिळविताना कंपनीला मोठ्या अडचणींना सामोरे जावे लागल्याचेही त्यांनी सांगितले. प्रारंभी कंपनी एरोसोल उद्योग आणि विविध व्यावसायिक क्षेत्रांसाठी हीटिंग इंधन म्हणून डीएमईचा पुरवठा करणार आहे.
या उद्घाटन समारंभास पूर्णवेळ संचालक एन. राजेश्वर रेड्डी, वरिष्ठ महाव्यवस्थापक गोविंद मेंचेकरे तसेच महाव्यवस्थापक विनय दुर्गम उपस्थित होते.
ईव्ही बॅटरी केमिकल्स क्षेत्रातही मोठा विस्तार
कंपनीच्या भविष्यातील धोरणाविषयी माहिती देताना डी. राम रेड्डी यांनी सांगितले की, ईव्ही बॅटरी केमिकल्स क्षेत्रातील वाढती मागणी लक्षात घेऊन कंपनी वेगाने विस्तार करत आहे. भविष्यात काही विद्यमान प्रकल्पांचे पुनर्रचना करून नव्या पिढीतील ईव्ही बॅटरी केमिकल्स उत्पादनासाठी त्यांचा वापर करण्यात येणार आहे.
डीएमसी आणि एनएमपी उत्पादनातही आघाडी
ईव्ही बॅटरी इलेक्ट्रोलाइट्समध्ये वापरल्या जाणाऱ्या या
डायमिथाईल कार्बोनेट (DMC) रसायनाचे उत्पादन करणारी बालाजी अमाईन्स ही भारतातील एकमेव कंपनी आहे. कंपनीकडे सध्या वार्षिक १५ हजार मेट्रिक टन उत्पादन क्षमता उपलब्ध आहे.
एन-मिथाईल पायरोलिडोन (NMP) :
गेल्या दोन दशकांपासून कंपनी एनएमपीचे उत्पादन करत असून आता ईव्ही बॅटरी ग्रेड सॉल्व्हेंटही विकसित करण्यात आले आहेत. देशभर उभारल्या जाणाऱ्या गिगा वॅट क्षमतेच्या ईव्ही बॅटरी प्रकल्पांना पुरवठा करण्यासाठी कंपनी सज्ज झाली आहे. डीएमसी आणि एनएमपी या दोन्ही रसायनांचे उत्पादन करणारी बालाजी अमाईन्स ही देशातील एकमेव कंपनी असल्याचे व्यवस्थापनाने स्पष्ट केले.
