सोलापूर – दर्शन घेत निघालेल्या संभाजीनगर येथील भाविकांच्या मोटार कारला समोरून एका मालट्रकने जोराची धडक दिल्याने झालेल्या भीषण अपघात एकाच कुटुंबातील एका भाविकाचा जागीच मृत्यू झाला तर कुटुंबातील सहा जण जखमी झाले.हा अपघात सोलापूर अक्कलकोट मार्गावर वळसंग टोल नाक्याजवळ आज रविवारी पहाटे एक वाजेच्या सुमारास घडला .
प्रकाश सिताराम देशमुख ( वय 50 वर्ष ) असे अपघातात जागीच मृत्यू झालेल्या भाविकांचे नाव आहे तर वर्षा प्रकाश देशमुख ( वय 39 वर्ष ) , विशाल प्रकाश देशमुख ( वय 24 ) , शिवानी योगेश देशमुख ( वय 21) , अमोल अशोकराव देशमुख ( वय 32 ) , अभिनव प्रभाकर देशमुख ( 13 ) आणि प्रिन्स अमोल देशमुख (वय 8 वर्ष ) अशी जखमी झालेल्यांची नावे आहेत.
वरील सर्वजण संभाजीनगरहून मोटर कार (क्र . MH 25 R 0588 ) देवदर्शन करत निघाले होते . शनिवारी रात्री पंढरपूर येथे दर्शन घेऊन ते सोलापूर मार्गे अक्कलकोट कडे दर्शनासाठी निघाले होते. आज रविवारी पहाटे त्यांची कार ही वळसंग टोल नाक्याजवळ आली असता समोरून येणाऱ्या ट्रकने (क्रमांक KA 32 AA 7450 ) त्यांना जोराची धडक दिली .या धडकेत कार मधील सर्वजण मार लागून जखमी झाले .सर्व जखमींना तातडीने कुंभारी येथील अश्विनी सहकारी रुग्णालयात दाखल करण्यात आले. मात्र डॉक्टरांनी प्रकाश देशमुख यांचा मृत्यू झाल्याचे घोषित केले. तर उर्वरित जखमींवर प्राथमिक उपचार करून सकाळी संभाजीनगर येथे पुढील उपचारासाठी हलविण्यात आले .
दरम्यान अपघाताची माहिती मिळताच वळसंग पोलीस घटनास्थळी दाखल झाले.मयत प्रकाश देशमुख यांचा मृतदेह शवविच्छेदनासाठी येथील शासकीय रुग्णालयात पाठविण्यात आला. शवविच्छेदनानंतर मृतदेह नातेवाईकांच्या ताब्यात देण्यात आला. घटनेचा पुढील तपास पोलीस करीत आहेत .
