सोलापूर – जिल्हा परिषद शाळांमधील विद्यार्थ्यांची आरोग्य तपासणी केवळ कागदावर न राहता प्रत्यक्षात प्रभावीपणे होत आहे का, याची पाहणी करण्यासाठी जिल्हा आरोग्य अधिकारी डॉ. सतीश कोपुरवाड यांनी मार्डी व बानेगाव येथील जिल्हा परिषद शाळांना भेट देत आरोग्य व्यवस्थेचा प्रत्यक्ष आढावा घेतला. विद्यार्थ्यांच्या आरोग्याबरोबरच त्यांच्या दैनंदिन जीवनशैलीतील बदलांवरही यावेळी भर देण्यात आला.
राज्याचे आरोग्य विभागाचे उपसंचालक डॉ. भगवान पवार आणि जिल्हा परिषदेचे मुख्य कार्यकारी अधिकारी कुशल जैन यांच्या सूचनेनुसार आणि मार्गदर्शनाखाली ही पाहणी करण्यात आली. राष्ट्रीय बाल स्वास्थ्य कार्यक्रमांतर्गत ६ ते १८ वर्षे वयोगटातील विद्यार्थ्यांची वैद्यकीय पथकांकडून नियमित आरोग्य तपासणी केली जाते. या तपासण्या नियोजित वेळेत होत आहेत का, विद्यार्थ्यांना आवश्यक उपचार मिळत आहेत का आणि गंभीर स्वरूपाच्या आरोग्य समस्यांवर संदर्भ सेवा उपलब्ध करून दिली जात आहे का, याची माहिती डॉ. कोपुरवाड यांनी घेतली.
तपासणीदरम्यान एखादा आजार किंवा आरोग्यविषयक समस्या आढळल्यास त्यावर विलंब न करता उपचार सुरू करावेत तसेच आवश्यकतेनुसार संबंधित विद्यार्थ्याला पुढील उपचारासाठी संदर्भित करावे, अशा स्पष्ट सूचना त्यांनी आरोग्य पथकांना दिल्या. विद्यार्थ्यांच्या आरोग्य नोंदी अद्ययावत ठेवण्याबाबतही त्यांनी मार्गदर्शन केले. यावेळी जिल्हा समन्वयक प्रदीप नामदे, संबंधित शाळांचे मुख्याध्यापक, शिक्षकवृंद तसेच आरोग्य विभागातील अधिकारी व कर्मचारी उपस्थित होते.
चौकट
‘जिद्द, मेहनत आणि आत्मविश्वास ठेवा’
कुष्ठरोग विभागाचे सहसंचालक डॉ. मोहन शेगर यांनी विद्यार्थ्यांशी संवाद साधत त्यांना प्रेरणादायी मार्गदर्शन केले. जिल्हा परिषद शाळेतून शिक्षण घेतल्याचा स्वतःचा अनुभव सांगत त्यांनी परिस्थिती कोणतीही असली तरी जिद्द, मेहनत आणि आत्मविश्वासाच्या जोरावर मोठी स्वप्ने साकार करता येतात, असा संदेश विद्यार्थ्यांना दिला.
चौकट
मोबाईलपासून मैदानी खेळांकडे वळण्याचा सल्ला
विद्यार्थ्यांना वैयक्तिक स्वच्छता, परिसर स्वच्छता, संतुलित आहार, योगासने आणि नियमित मैदानी खेळांचे महत्त्व समजावून सांगण्यात आले. मोबाईल आणि दूरचित्रवाणीच्या अतिवापरामुळे होणारे शारीरिक व मानसिक दुष्परिणाम लक्षात घेता विद्यार्थ्यांनी ‘डिजिटल डिटॉक्स’ला प्राधान्य देऊन स्क्रीन टाइम कमी करावा, असा सल्लाही यावेळी जिल्हा आरोग्य अधिकारी डॉ सतीश कोपूरवाड यांनी दिला.
चौकट
उच्च जोखमीच्या गर्भवतीचीही गृहभेट
मार्डी येथील एका उच्च जोखमीच्या गर्भवती मातेच्या घरी आरोग्य पथकाने भेट देऊन तिच्या प्रकृतीची विचारपूस केली. तिच्या आरोग्यस्थितीवर नियमित लक्ष ठेवण्याबरोबरच आवश्यक सेवा वेळेत उपलब्ध करून देण्याच्या सूचना आरोग्य कर्मचाऱ्यांना देण्यात आल्या. त्यामुळे शाळेतील विद्यार्थ्यांच्या आरोग्य तपासणीसोबतच गावातील माता-बाल आरोग्य व्यवस्थेचाही प्रत्यक्ष आढावा या दौऱ्यात घेण्यात आला.
