सोलापूर लोकसभा मतदारसंघात मोठ्या राजकीय उलथापालथी सुरु झाल्या आहेत. लोकसभेच्या निवडणुकी अगोदर आमदार प्रणिती शिंदे आणि माजी मुख्यमंत्री सुशीलकुमार शिंदेंनी प्रचाराचा अप्रत्यक्षपणे नारळ फोडला आहे. बुधवारी सोलापूर शहरातील शिवसेनेच्या नेते दिलीप माने यांनी कार्यकर्त्यांचा मेळावा बोलावून मतं जाणून घेतली. यावेळी कार्यकर्ते आणि पदाधिकाऱ्यांनी काँग्रेसमध्ये प्रवेश करण्याची मागणी करत विरोधकांना धक्का दिला आहे.
माजी आमदार व शिवसेना नेते दिलीप माने यांनी सोलापूर कोल्हापूर महामार्गावर एका महाविद्यालयाच्या क्रीडांगणावर कार्यकर्त्यांचा मेळावा घेऊन सर्वांचं ऐकलं आणि काँग्रेसमध्ये जाण्याची घोषणा केली. आगामी विधानसभा निवडणुकीत दक्षिण सोलापूर मतदारसंघातून काँग्रेसकडून निवडणूक लढवण्याची इच्छा देखील कार्यकर्त्यांनी व्यक्त केली आहे.
२०१९ च्या विधानसभा निवडणुकीत दिलीप माने यांनी शिवसेनेकडून प्रणिती शिंदे यांच्याविरोधात मध्य सोलापूरमधून निवडणूक लढवली होती. प्रणिती शिंदेंना आमदारकीच्या निवडणुकीत पाडण्यासाठी दिलीप मानेंनी मोठी ताकद लावली होती. आता मात्र लोकसभा निवडणुकीत शिवसेनेच्या दिलीप माने यांना काँग्रेसचे काम करावे लागणार आहे.
एक वेळा आमदार दोन वेळा पराभव, प्रणितींच्या विरोधात जोरदार प्रचार
दिलीप माने यांची दक्षिण सोलापूर तालुक्यातील काँग्रेसचे मोठे नेते म्हणून ओळख होती. २००९ मध्ये काँग्रेसकडून त्यांनी दक्षिण सोलापूरमधून विधानसभा निवडणूक लढवत विजय मिळवला होता. २०१४ मध्ये भाजपच्या सुभाष देशमुख यांनी दिलीप मानेंचा पराभव केला होता.२ ०१९ च्या विधानसभा निवडणुकीत दिलीप माने यांनी थेट मतदारसंघ बदलला आणि प्रणिती शिंदेंच्या विरोधात शिवसेनेकडून उमेदवारी अर्ज भरला. शिवसेनेत दिग्गज नेते अगोदरपासून असताना देखील शिवसेनेने पक्षातील जुन्या नेत्यांना डावलून काँग्रेसमधून आलेल्या दिलीप माने यांना तिकीट दिले होते. २०१९ साली सोलापूर शहर मध्य विधानसभेच्या निवडणुकीत दिलीप माने यांनी प्रणिती शिंदेना टक्कर देत चौथ्या क्रमांकाची मते प्राप्त केली होती.प्रणिती शिंदे यांना पाडण्यासाठी दिलीप माने यांनी सोलापूर शहर मध्य विधानसभा मतदारसंघात जोरदार प्रचार केला होता. आता मात्र लोकसभा निवडणुकीत प्रणितींचं काम करण्याची वेळ दिलीप मानेंवर आली आहे.
काँग्रेसमध्ये जाण्याचे अप्रत्यक्ष संकेत
राज्यात उद्धव ठाकरे सरकार जाऊन शिंदे सरकार आले आणि शिवसेना पक्षात देखील फूट पडली होती. माजी आमदार दिलीप माने यांनी राज्यातील राजकीय उलथापालथनंतर स्वतःची राजकीय भूमिका स्पष्ट केली नव्हती. अनेक दिवस संभ्रमात राहिल्यानंतर, स्वतःच्या व्यवसायात मग्न असणाऱ्या दिलीप माने यांनी २०२४ च्या लोकसभा निवडणुकी अगोदर राजकीय भूमिका स्पष्ट करण्याचा प्रयत्न केलाय. कार्यकर्त्यांच्या आग्रहाचं कारण देत काँग्रेस मध्ये जाण्याचं दिलीप माने यांनी सांगितले.
विधानसभा निवडणुकीत झालेली चूक २०२४ च्या लोकसभा निवडणुकीत सुधारणार?
२०१९ साली दक्षिण सोलापूर विधानसभा मतदारसंघ सोडून मध्य विधानसभा मतदारसंघातून नशीब आजमावणाऱ्या दिलीप मानेंनी घोडचूक केल्याची चर्चा राजकीय वर्तुळात अनेक दिवसांपासून होती. २०१९ मध्ये आमदारकीच्या निवडणुकीत काँग्रेसच्या नवख्या उमेदवाराने भाजपच्या सुभाष देशमुख यांना कडवी झुंज देत दुसऱ्या क्रमांकाची मते प्राप्त केली होती. २०१९ मध्ये दिलीप माने यांनी भाजपच्या सुभाष देशमुख यांच्या विरोधात दक्षिण सोलापूर विधानसभा निवडणूक लढली असती तर ते आज आमदार झाले असते, अशा चर्चा अनेकदा राजकीय वर्तुळात केल्या गेल्या आहेत. २०१९ मध्ये झालेली चूक २०२४ च्या लोकसभा निवडणुकी अगोदर दिलीप मानेंनी सुधारून घेतली की काय, असे चित्र दिसून आले. कार्यकर्त्यांची इच्छा असेल तर मी मी काँग्रेसमध्ये जाणार असेही दिलीप माने यांनी माध्यमांना माहिती देताना सांगितले.
विधानसभा निवडणुकीत प्रणितींच्या विरोधात काम, आता प्रचाराची वेळ
२०१९ च्या विधानसभा निवडणुकीत दिलीप माने यांनी प्रणिती शिंदेंच्या विरोधात दंड थोपटले होते. दिलीप मानेंनी शिवसेनेकडून विधानसभा निवडणूक लढवत प्रणितींना टक्कर दिली होती. दक्षिण सोलापूर, उत्तर सोलापूर आणि मध्य सोलापूर मधील माझ्या कार्यकर्त्यांनी मला काँग्रेसमध्ये जाण्याचा सल्ला दिला असेल आणि त्यांची इच्छा असेल तर मी काँग्रेसमध्ये जाणार आणि लोकसभा निवडणुकीत प्रणिती शिंदेंचं काम करणार असे दिलीप माने यांनी माध्यमांना माहिती देताना सांगितले.
